Үлэ фронугар сылдьыбытым

(Ахтыы)

   Мин, Николай Егорович Голиков, 1911 сыллаахха ахсынньы 19 күнүгэр Суотту нэһилиэгэр төрөөбүтүм. Кыһыл Кырдал оскуолатын икки кылааһын бүтэрбитим. 1929 сыллаахха абаҕам В.М.Голиков председателлээх “Хаамыы” колхоз тэриллибитэ. Онно мин таабыл толорооччунан үлэлээбитим. Председательгэ эбии хамнас көрүллүбэт этэ. Колхоз үлэһиттэрин кытта тэҥҥэ үлэлээн, үлэ төлөбүрүн аахсаллара. 1932 сыллаахха колхозтары бөдөҥсүтүү барбыта. Ол кэмҥэ “Үүт табаарынай фермата” тэриллибитэ. Бөдөҥсүйбүт колхозка “Хаамыы», «Ала Соболоох», «Көрдүгэннээх», «Хомусаах», Суоттуттан «Дьиэрэ» киирбиттэрэ. Колхоз киининэн “Ала Соболоох» буолбута. Председателинэн Гаврил Николаевич Пермяков үлэлээбитэ.

   1936-37 сыллардаахха Моой Үрэххэ таһаҕас таһыытыгар сылдьыбытым. 1941-42 сс. фермаҕа биригэдьииринэн, 1942-44 сс. икки сыл устата үлэ фронугар ыҥырыллан Читаҕа ботуруон оҥорор собуокка үлэлээбитим. Кэлин доруобуйабынан инбэлиит буолан төннүбүтүм. 1944-45сс. Охотскай перевозка, Ааллаах Үүҥҥэ таһаҕас таһыытыгар ыыппыттара. 1947 сыллаахха «1941-45 сс. Аҕа дойду сэриитин сылларыгар килбиэннээх үлэтин иһин” мэтээлинэн наҕараадаламмытым.

   Сэрии кэнниттэн биригэдьииринэн, кыладыапсыгынан үлэлээбитим. Кыһынын от тиэйиитигэр, сайынын от, оҕуруот үлэтигэр элбэх сырабын биэрбитим. 1967 сыллаахха кулун тутар ыйга “Лена» совхоз тэриллэн, пенсияҕа тахсыахпар диэри онно рабочайынан үлэлээбитим. 1970-72 сылларга гаражка кочегардаабытым, сайынын кыраабыл, атырдьах оҥорорум. Улуу Октябрь 60 сыллаах үбүлүөйүнэн ветераннар сүлүөттэригэр “Үлэ ветерана» ааты иҥэрбиттэрэ.    

                                                                             Николай Голиков.

                                                                             Тыыл, үлэ ветеранын ахтыытыттан

                                                      “Мүрү саһарҕата», 2004 сыл, от ыйын 17 күнэ