"Найахылар сэрии сылларыгар" диэн сэрии кэминээҕи олоҕу көрдөрөр быыстапка, “Саллаат суола” театрализованнай дьүһүйүүнү көрдөрдүлэр. Найахылар ыалдьыттары кыайыы алаадьытынан айах тутан көрүстүлэр, Найахы модельнай библиотекатын, музейын үлэһиттэрэ, оскуола үөрэнээччилэрэ быыстапка экспонаттарын туһунан кэпсээтилэр. Быыстапкаҕа уоттаах сэрии толоонуттан күн бүгүҥҥэ диэри тиийэн кэлбит сэдэх экспонаттар, буорах сыттаах суруктар, нэһилиэктэн сэрии толоонугар хорсуннарын көрдөрөн, бойобуой орденнарынан, мэтээллэринэн наҕараадаламмыт биир дойдулаахтарбыт мэтээллэрэ, Найахы нэһилиэгиттэн сэрии кыттыылаахтарын хаартыскалара, биографиялара турдулар.  Чахчы да баай ис хоһоонноох, үйэлэргэ умнуллубат, дьиҥнээх олох сайдыытын көрдөрөр хаартыскалар, стендэлэр, альбомнар хас биирдии киһиэхэ ананан оҕоһуллубут паапкалар Андрей Михайлович иҥэн-тоҥон, кичэйэн, биир тэҥ кылыгырас буочарынан суруйбут сүүһүнэн ахсааннаах страницаларын сөҕө-махтана көрдүбүт.

Салгыы ыалдьыттар “Саллаат суола” диэн театрализованнай дьүһүйүүнү көрдүлэр. Сэрии кэмигэр анаммыт элбэх ырыалардаах, хоһооннордоох дьүһүйүү үгүс көрөөччү биһирэбилин ылла.