Советскай Аармыйа офицердара Андрей, Гаврил Иванович Андросовтар, саллааттар Иван Иванович, Никифор Елисеевич, тыыл ветераннара Ульяна Афанасьевна, трактористка Анастасия Ивановна Андросова, Евдокия Евсеевна Турантаева сырдык кэриэстэригэр бүгүн анабыл,кэриэстэбил күнэ буолла. Музейга "Андросовтар-үйэттэн үйэҕэ" быыстапка үөрүүлээхтик аһылынна. Манна кыттыыны ыллылар Андросовтар сыдьааннара: Саха республикатын культуратын үтүөлээх үлэһитэ, туйгуна Надежда Андреевна Попова-Андросова, Саха республикатын үөрэҕириитин туйгуна, музыкальнай колледж преподавателэ Мария Ивановна Шамаева, РСФСР уонна Саха республикатын үөрэҕириитин туйгуна, Мүрү нэһилиэгин бочуоттаах олохтооҕо бырайыак автора Людмила Афанасьевна Андросова, Бойлохова Любовь Андреевна уонна кыайыыны уһансыбыт Андросовтар кийииттэрэ
Мария Степановна Андросова, сиэннэр,хос сиэннэр, чугас аймахтара.
Быыстапкаҕа музей фондатыгар баар буойуннар фронтан суруктара, докумуоннара, тус маллара көрдөрүүгэ туруорулуннулар. Андросовтар музейга дьоннорун олохторун кэрэһэлиир баннердары, дискэни, докумуоннар, былыргы хаартыскалар копияларын бэлэхтээтилэр.Музей коллективыгар үйэтитиигэ ыытар утумнаах үлэлэрин иһин махтаннылар. Экскурсия кэмигэр Л.А.Андросова сыралаах үлэтин түмүгүнэн уһуллубут "Тимир көлө хоптолоро" диэн документальнай киинэни көрдүлэр.