1923 сыллаахха Сыҥаах нэһилиэгэр Хардыыга төрөөбүтэ. Суотту сыһыытын начальнай оскуолатын үөрэнэн бүтэрэн баран, үөрэҕин Мүрү оскуолатыгар салҕаабыта. 1941 сыллаахха атырдьах ыйын 1 күнүгэр армияҕа Чурапчы военкоматынан ыҥырыллыбыта. Ленинградскай фроҥҥа Ржев-Вязьма туһаайыытынан сэриилэспит. («Сахалар Ржев-Вязьма кыргыһыытыгар»), Старшай сержант 1942 сыл кулун тутар 23 күнүгэр сэриилэһэ сылдьан ыараханнык бааһыран, Калининскай уобалас Максатиха станциятыгар госпитальга киирбитэ. 1942 сыл бэс ыйын 9 күнүгэр бу госпитальга өлбүтэ. Ол туһунан командирыттан аҕатыгар маннык ис хоһоонноох биллэрии кэлбитэ: «Ваш сын старший сержант Алексеев Семен Михайлович в бою за социалистическую Родину, верной воинской присяге, проявив геройство и мужество умер от раны 9-06-42 г. и похоронен на кладбище Максатихи Калининской области». Сэрии кэнниттэн нэһилиэнньэлээх пууннар араастык уларыйыыларынан буолуон сөп: «Тверской уобалас Осташковскай оройуонун Ровень Мосты дэриэбинэтигэр көмүс уҥуоҕа көтөҕүллүбүтэ» диэн «Память т. 1. с.29 киирбит. Кэлин аата Ржев куоракка туруоруллубут саха буойуннарын пааматынньыгар суруллубута. Кэргэннэмэтэҕэ. Бииргэ төрөөбүт балта Алексеева Анна Михайловна Элэһиҥҥэ олорбута. Элбэх оҕолоох, сиэннэрдээх.