Алексеев Петр Спиридонович (1906-1974)

     1906 сыллаахха Сыҥаах нэһилиэгэр төрөөбүтэ. Кыра үөрэхтээх. 1937 сылтан 1943 сылга диэри Сыҥаах нэһилиэгин советын председателинэн үлэлээбит. Кини үлэлиир кэмигэр нэһилиэккэ биэс колхоз баара. Дьараама сиригэр “Хардыы”, Хааттыга Ворошилов аатынан, Даалыга “Сайдыы”, Лөгөй ыпсыытыгар Киров аатынан, Хара Лаптыга “Хомустаах”. Колхозтар маҥнай тэриллэр кэмнэригэр техника суоҕун үрдүнэн үлэ-хамнас бэрт тэтимнээхтик, кыайыылаахтык барара. Бааһына сирин кэҥэтэн, ходуһа сирдэрин оҥорон, общественнай тутуулары ыытыы киэҥник барбыта. Сенокосилка, молотилка атыыласпыттара. Нэһилиэнньэни үөрэхтээһин, бөһүөлэктэри тутуу, кулууптары, оскуолалары аһыы, уопсай тутуулары тутуу барбыта. 1939 сыллаахха 5 колхоһу холбоон, 3 колхоз оҥорбуттара: “Хомустаах”, Киров аатынан колхозтар “Сайдыыга” холбоспуттара. Ити холбоһуунан сибээстээн бөһүөлэктээһин уонна бөдөҥ культурнай уонна производственнай тутуулар саҕаламмыттара. Саҥа бөһүөлэктэр Сайдыыга Даалы, Хааттыга Киров уонна Хардыыга уончалыы саҥа дьиэлэр тутуллубуттара. Ол сылларга соҕурууттан украинецтар кэлэллэр диэн хас колхоз ахсын саҥа дьиэлэри туттарбыттара. Хардыыга кулууп тутуллубута. Улахан хотоннор Хардыыга, Хааттыга, Даалыга тутуллубуттара. Сыҥаах нэһилиэгэр биир начальнай оскуола баара. Суотту Сыһыытыгар оҕолор ыраахтан сатыы сылдьан үөрэнэллэрэ. Үөрэнэр оҕолорго усулуобуйаны тэрийии сэбиэт председателин болҕомтотугар туpapa. Петр Спиридонович 1943 сыллаахха армияҕа ыҥырыллыбыта. «Японияны кыайыы иһин», «1941-1945 сс. Аҕа дойду Улуу сэриитин сылларыгар килбиэннээх үлэтин иһин» мэтээллэринэн наҕараадаламмыта. 1974 сыллаахха өлбүтэ.