Попов Петр Петрович (1924-1974)

         1924 сыллаахха Сыҥаах нэһилиэгэр төрөөбүтэ. Оҕо сааһыгар төгүрүк тулаайах хаалан, I Лөгөй нэһилиэгэр иитиэххэ сылдьыбыта. 1940 сыллаахха Мүрү оскуолатын 7-с кылааһын бүтэрбитэ уонна “Бөлөхтөһүү” колхозка суоччутунан үлэлээбитэ. 1943 сылтан 1947 сылга диэри армияҕа сылдьыбыта, “Германияны кыайыы иһин” мэтээлинэн наҕараадаламмыта. Дойдутугар кэлээт оройуоннааҕҕы үп салаатыгар 1949 сыллаахха диэри бухгалтерынан үлэлээбитэ. Онтон 1949-52 сс. Хардыыга колхоз суоччутунан, кэлин председателинэн үлэлээбитэ. 1952 сыллаахха “Хардыы”, Ворошилов, Молотов аатынан колхозтар холбоһон биир бөдөҥсүйбүт Киров аатынан колхоз буолууларыгар кылаабынай бухгалтерынан быыбарданан 1956 сылга диэри үлэлээбитэ. 1956-59 сс. колхоз председателинэн талыллан таһаарыылаахтык үлэлээбитэ, 1958 сыллаахха Саха АССР Верховнай Советын Бочуотунай Грамотатынан наҕараадаламмыта. 1959-62 сс. бөдөҥсүйбүт Энгельс аатынан, “Лена” колхозтар председателлэринэн, солбуйар председателинэн, 1963-67 сс. “Лена” совхозеп партком секретарынан үлэлээбитэ. 1967-71 сс. совхоз переоценкатын, маҥнайгы первичнай докумуонун олохтообута, бэйэтин коллегаларын бухгалтерия уустук ньыматыгар угуйбута. Оройуоҥҥа иккис совхоз тэриллибитигэр, “Дүпсүн” совхозка кылаабынай бухгалтерынан 1971-74 сс. быыбарданан үлэлээбитэ. Баай опыттаах буолан, совхоз бастакы тэриллиитин дьыалатын судургу, табыгастаах гына оҥорбута уонна ону баһылыырга эдэр кадрдары үөрэппитэ. 1974 сыллаахха уоппускатыгар сылдьан оһолго түбэһэн хомолтолоохтук өлбүтэ. Дьоно, оҕолоро Суоттуга олороллор.