Васильев Филипп Иванович (1918-2000)

1918 сыллаахха бэс ыйын 16 күнүгэр I Суотту нэһилиэгэр дьадаҥы кэргэҥҥэ төрөөбүтэ. 1931-1934 сс. үөрэнэн 4 кылааһы бүтэрбитэ. 1931 сылга дьоно колхозка киирбиттэрэ. Онон Филипп эмиэ колхозтаах буолбута. Колхозка 1937-42 сылга диэри ферма сэбиэдиссэйинэн үлэлээбитэ. 1942 сыллаахха Аҕа дойду көмүскэлигэр сэриилэһэр армияҕа ыҥырыллыбыт. Бастаан 5-с отдельнай хайыһар батальонугар стрелогунан, онтон 1942-1945 сс. диэри 22-с гвардейскай механизированнай бригада 103-с стрелковай полкатыгар автоматчигынан сылдьыбыт. Сэрии сылларыгар Сталинград, Киев, Харьков, Полтава, Львов куораттары босхолоспута. Онтон Польшаны чиэрэстээн Арҕаа Германияҕа тиийэн кыайыыны көрсүбүтэ. Хорсун саллаат “Сталинград оборонатын иһин”, “Праганы босхолооһун иһин”, “Берлини ылыы иһин” медалларынан наҕараадаламмыта. Кыһыл Армия кэккэтиттэн 1946 сыл от ыйыгар босхолонон дойдутугар эргиллэн кэлбитэ. 1947-1957 сс. колхозка ферма сэбиэдиссэйинэн үлэлээбитэ. Ити үлэтигэр үчүгэй көрдөрүүтүн иһин 1955 сыллаахха Москваҕа Бүтүн Союзтааҕы тыа хаһаайыстыбатын быыстапкатыгар күүлэйдии бара сылдьыбыта. 1957 сыллаахха “Үлэҕэ килбиэнин иһин” медалынан наҕараадаламмыта. 1968-1972 сс. совхозка кыладыапсыгынан, 1972 сылтан совхозка сүөһү үлэтигэр үлэлээбитэ. 2 оҕолоох, сиэттэрдээх. 2000 сыллаахха  атырдьах ыйын 22 күнүгэр өлбүтэ.