1918 сыллаахха Найахы нэһилиэгэр Чараҥытта алаас арҕаа бас халдьаайытыгар Гаврильевтар төрүттэрэ түөлбэлээн олорбут сирдэригэр Ньыкыы Хабырыыс уола Мах Сэмэйкэ сиэнэ Тихон Иннокентьевичка соҕотох уол оҕонон төрөөбүтэ. Алексей  1931 с.нэһилиэгэр бастаан аһыллыбыт оскуола  1-кы кылааһыгар киирэн начаалынайы бүтэрэн, 5-с кылааска тиийэ үөрэммитэ. Биир көлүөнэлээхтэриттэн ойуччу кыаллар, бөдөҥ-садаҥ уол оҕо буолан тыыллан тахсыбыта үһү. Ол иһин оҕолор Таанка диэн сүрэхтээбиттэр. Салгыы үөрэммэккэ уурайан, холкуоһугар  Кыһыл сардаҥаҕа үлэһит буолбут. Кыайыылаах үлэһит быһыытынан сотору удаарынньык аатын ситиспит. От оҕустаҕына күҥҥэ балтараа гектары, табыллыбыт күнүгэр иккигэ тиийэ алааһын бэттиэмэтин тэлгэтэрэ. Ыччаттар Сайылык алааска тустан көрүлээтэхтэринэ тэҥнээҕэ суоҕа.

 1939 сыллаахха Уус-Алдан МТС-гар нэһилиэгин уолаттарыттан маҥнайгынан тырахтарыыс идэтигэр үөрэнэн, үлэлээн иһэн, дойдутугар төннөн үлэлээбитэ. Дьиэ-уот тэриммэккэ сырыттаҕына, уоттаах сэрии төлө тардыллан,  1941 сыллаахха маҥнайгылары кытары Ийэ дойдутун көмүскэһэ барбыта. 1942 сыллаахха от ыйын 16 күнүнээҕи суругар, Москваттан  250 км сиргэ Смоленскай уобалас сиригэр сэриилэһэ сылдьарын туһунан ахтыбыт эбит.  1945 сыллаахха ыарыһах буолан сыккырыыр тыына эрэ кэлээхтээбит уонна уһаабатах. Ханан, хайдах сэриилэспитин кэпсээбитэ биллибэт. Өстөөх буулдьатыттан буолбакка, билиэн түбэһэ сылдьыбытым иһин бэйэм дьонун илиилэриттэн бу айылаах буоллум - диэхтээбитэ үһү.