Горохов Алексей Егорович (1924-1966)

1924 сыллаахха төрөөбүтэ. Чурапчы военкоматынан 1942 с. от ыйын 2 күнүгэр сэриилэһэр армияҕа ыҥырыллыбыта. "Германияны кыайыы иһин", "Японияны кыайыы иһин" мэтээллэрдээх. 1966 сыллаахха өлбүтэ.

Винокуров Николай Николаевич (1920-1979)

1920 сыллаах төрөөбүтэ. 1938-39 сс. хорҕолдьун уонна көмүс хостуур рудниктарга сайын өрүһүнэн кэлбит таһаҕастары таһыыга сылдьыбыта. Илин сэрии кыттыылааҕа. 1943 сыллаахха от ыйын 2 күнүгэр Чурапчы военкоматынан сэриигэ ыҥырыллыбыта. 1947 сыл эргин дойдутугар кэлбит. Колхоз биир төһүү үлэһитэ. 1979 с. хомолтолоохтук ууга өлбүт.

Бурнашев Иван Дмитриевич (1925-1996)

Чурапчы военкоматынан 1943 с. сэриигэ ыҥырыллыбыт. 

Бурнашев Гаврил Иванович I (1925-?)

1925 сыллаахха кулун тутар 15 күнүгэр Чэриктэйгэ төрөөбүтэ. 1942-45 сс. "Ыччат суола" колхозка биригэдьииринэн үлэлээбитэ. 1945 сыллаахха Чурапчы военкоматынан ыҥырыллан илиҥҥи фроҥҥа сэриилэһэ барар. Атырдьах ыйыгар кыраныыссаны туораан, Маньчжурия аннынан тыҥааһыннаах ытыалаһыыга дьоппуоннары кыайбыттар. Ситикарь, Чань-Чунь, Харбин, Мукден куораттары улахан сэриитэ суох ылбыттар. Кинилэри уута суох Гоби кумах куйаара да, Улахан Хинган да хайата тохтоппотох. 1946 сыллаахха Читаҕа кэлбит уонна 1951 сылга диэри секретнай чааска художник-чертежник карта оҥоруутугар үлэлээбит. 1951-56 сс. Уус-Майаҕа, Сангарга милиция отделыгар сулууспалаабыт. 1956-97 сс. Саха Республикатын авиапордугар 41 сыл устата авиадиспетчерынан үлэлээбит. 

Наҕараадалара: "Японияны кыайыы иһин", "Сталин төрөөбүтэ 120 сыла","Советскай Союз Маршала Жуков", Аҕа дойду сэриитин II-с степеннээх ордена, үлэ, тыыл, Саха сирин авиациятын ветерана.

Бочкарев Василий Васильевич (927-1991)

1927 сыллаахха 5 оҕолоох дьадаҥы ыалга төрөөбүтэ. Бииргэ төрөөбүттэрэ бары элбэх оҕолоох дьиэ кэргэн ийэлэрэ-аҕалара буолбут дьон. Баһылай 4 кылаас үөрэхтээх. Колхозка үлэтин 9 саастааҕыттан саҕалаабыта. 1942 сылтан кыһыннары, сайыннары государственнай суолталаах балык булдугар сылдьыбыта. Ааллаах-Үүҥҥэ 1943 сыллаахха таһаҕас тиэйиитигэр сылдьан былааннарын 130 % толорон бириэмийэлэммиттэрэ. 

Юиригэдьииринэн үлэлии сылдьан 1945 сыллаахха бэс ыйын 5 күнүгэр аармыйаҕа ыҥырыллыбыта. Японияны утары сэриигэ кыттыыны ылбыта. Маньчжуриянан, Монголиянан 6 сыл сулууспалаан дойдутугар эргиллибитэ. "Японияны кыайыы иһин", юбилейнай мэтээллэринэн наҕараадаламмыта. 1991 сыллаахха ыалдьан өлбүтэ. Кэргэннээх, 6 үлэһит, ыал буолбут оҕолордоох.