Ушницкий Семен Дмитриевич (1914-1943)
1914 сыллаах төрүөх. 1932 сылтан комсомол чилиэнэ. Комсомол путевкатынан Алдан куоракка (1934-1936 сс.) баран көмүскэ үлэлээбит. "Социализм суола " колхоз хонуу биригээдэтин биригэдьиирэ. 1937 сыллаахха ыҥыыр атынан Кылаҕыртан Моой үрэххэ, Верхоянскай куорат таһынан Эһэ хайаҕа таһаҕас таспыта. Семен Ушницкай сааскы ыһыыны туорахтаах культураҕа 36,54 га былааннааҕын, аҕыс күн устата 37,29 ганан толорбут. Кини бастыҥ үүнүүлээх бааһынатыттан сэлиэһинэй культуратын 25 ц. ылбыта. Ол туһунан М. Попов "Большевиктыы тэрийээччи" хаһыат 1939 сыл тохсунньу ый 28 күнүнээҕи нүөмэригэр "С. Попов өлгөм дохуоттанна" диэн ыстатыйатыгар бу курдук суруйар: "Чэриктэй. "Социализм суола" колхоз чилиэнэ Сэмэн Миитэрэйэбис Ушницкай колхозка киһи билэриттэн ыла наар күүһүн-сатабылын харыстаабакка үлэлээн кэллэ. Кини 1938 сыллаахха колхозка үлэлээн 918 көлөһүн күнүн оҥордо. Манна 275 буут бурдугу, ол иһиттэн 250 буут сэлиэһинэйи, 30 буут собону о.д.а. бородууктаны ылла. Сэмэн Миитэрэйэбис култуурунай байылыат дохуоттааҕынан буолла. Кини инникитин дөссө үчүгэйдик, таһаарыылаахтык үлэлииргэ охсуһар". Онтон эмиэ бу сыл оройуон хаһыатыгар бэс ыйын 3 күнүнээҕи Испирдиэн Омуоһап ыстатыйатыгар бу курдук суруллар "Чэриктэй. "Социализм суола" колхоз чулуу стахановеһа, биригэдьиир Сэмэн Миитэрэйэбис Ушницкай сааскы ыһыыны туорахтаах культураҕа 36,54 былааннааҕын, 8 күн устата 37,29 га толордо". Үрдүк үүнүүнү ылан 1939 с. Москваҕа Бүтүн Союзтааҕы тыа хаһаайыстыбатын быыстапкатыгар кыттар чиэскэ тиксибит.
Кини Дьокуускайдааҕа холбоһуктаах военкоматынан ыҥырыллан, 1942 сыллаахха сэриигэ барбыт. Сэриигэ барарыгар Сэмэн Ушницкай трибунаҕа тахсан, сэриигэ барааччылар ааттарыттан тыл эппит: "Күндү ийэлэрбит, аҕаларбыт, быырааттарбыт, балыстарбыт, сэрии суоһа-содула ыраатта. Биһиги сэрии хонуутугар иэспитин чиэстээхтик толоруохпут, онтон эһиги үлэҕитин-хамнаскытын ыһыктымаҥ, биһигини суохтаамаҥ, өстөөҕү кыайар туһугар хорсуннук үлэлээҥ!" (кыыһа Анастасия Семеновна ийэтин тылыттан ахтыыта). 1943 сыл алтынньытыгар өлбүт. Кэргэннээх. Сэриигэ барарыгар 6 ыйдаах кыыс оҕото хаалбыта. Анастасия Семеновна улаатан баран Карл Маркс колхозка икки сыл хара үлэҕэ үлэлээбитэ. Үс сыл Дүпсүн сельпотугар пекардаабыта. Тыа хаһаайыстыбатын курсун бүтэрэн, 1967 сыллаахха Чурапчыга үлэлии тахсыбыта. 2006 с. ыалдьан өлбүтэ. Үс уол оҕолоох.