Сэрии... Суостаах-суодаллаах сэрии! Төһөлөөх эдэркээн олох олорорго баҕарбыт аҕай уолаттар сэрииттэн тыыннаах эргиллэн кэлбэтэхтэрэ буолуой? Сэрии толоонугар охтубуттарга уонна ынырык хабыр хапсыһыылартан мүлчү туттаран кэлбит саха буойуннарын ааттарыгар сүгүрүйэр ытык иэспит.

Бу сыл олунньу 20 күнүгэр оскуолабытыгар биир дойдулаахпыт хоһоонньут,тылбаасчыт СӨ култууратын үтүөлээх үлэһитэ,Аҕа Дойду Улуу сэриитин кыттыылаҕа Иннокентий Иванович Артамонов аатынан "Буорах сыттаах хоһооннор" диэн хоһоон ааҕыытыгар куонкурус буолан ааста.

Кулууп саалатын иһигэр байыаннай таҥастаах оҕо-аймах толору муһунна. Дьүллүүр сүбэ В.А.Протодьяконов -Кулантай аатынан литература музейын үлэһиттэрэ : методист Л.П. Свинобоева, экскурсовод А.П. Сивцев уонна Бэйдиҥэ орто оскуолатын саха тылын,литературатын учуутала А.Н.Захарова сыаналаатылар.

Бу тэрээһин бастакы чааһыгар литературнай музей үлэһиттэрэ оҕолору кытта кэпсэттилэр, Чараҥ оскуолатын оҕолоро уһуллубут киинэлэриттэн быһа тардан көрдөрдүлэр.Сэрии ааспыт ыар сылларын,иэдээнин туһунан айымньылары сырдаттылар.

   Куонкуруска алын сүһүөх кылаастарга бастакы миэстэни 2 кылаас"Партизан пионер" диэн хоһоону ааҕан ылла,кылаас салайааччыта М.Г. Говорова.Иккис миэстэ буоллулар 4 кылаас үөрэнээччилэрэ, кылаас салайааччыта И.Г.Алексеева. Үһүс миэстэ буоллулар 3 кылаас үөрэнээччилэрэ,кылаас салайааччыта Е.С.Маркова.

Орто сүһүөххэ "Норуот сүрэҕэр сылдьыахпыт"диэн хоһоону ааҕан, бастакы миэстэ буоллулар алтыс кылаас үөрэнээччилэрэ,кылаас салайааччыта математика учуутала, Р.Д.Маркова. Иккис миэстэ буоллулар сэттис кылаас үөрэнээччилэрэ,кылаас салайааччыта биология,химия учуутала Л.Э.Егорова. Үһүс миэстэ буоллулар бэһис кылаас үөрэнээччилэрэ,кылаас салайааччыта саха тылын,литературатын учуутала А.Б.Колосова .

Үрдүкү кылаастарга "Умнуллубат күннэр" хоһоону ааҕан бастакы миэстэ буоллулар ,тохсус кылаас үөрэнээччилэрэ,кылаас салайааччыта нуучча тылын уонна литературатын учуутала А.И.Варламова. Иккис миэстэ буоллулар 10 кылаас үөрэнээччилэрэ, кылаас салайааччыта физкультура учуутала Н.Б.Докторова. Үһүс миэстэ буоллулар 8 кылаас үөрэнээччилэрэ,кылаас салайааччыта математика учуутала Ф.С.Охлопкова.

Дьүүллүүр сүбэ оҕолору хайҕаата,сорохторго хоһоону ааҕыыга сүбэ-ама биэрдэ.

Ити курдук, күн бүгүн уостан түспэт ырыа буолбут иэйиилээх хоһооннордоох поэт, буойун-суруйааччы, Иннокентий Иванович Артамонов аатынан хоһоон ааҕыытын куонкуруһа таһымнаахтык ааста.