Хаһыат бүгүҥҥү нүөмэриттэн «Бэтэрээн ыра санаата» диэн саҥа бырайыак үлэтин саҕалыыр. Иллээх-эйэлээх, дьоллоох олох иһин доруобуйаларын кэрэйбэккэ, олохторун да толук ууран туран, фашизмы утары Аҕа дойду сэриитигэр кыргыспыт биир дойдулаахтарбыт сыллата аҕыйаан иһэллэр. Билигин улууспутугар ытык бэтэрээннэрбит үһүөлэр. Кинилэргэ сүһүөхтээх бэйэбит сүгүрүйэн туран, ханнык да тылларынан кыайан эппэт муҥура суох махталлаахпыт. Саҥа бырайыакпыт күндү дьоммутугар махталбыт бэлиэтинэн буолла.
Хас биирдии киһи ыра санаалаах. Ыра санаа кыра даҕаны, улахан да буоллун, туоллаҕына, киһи санаалыын чэпчиир, дуоһуйар. Ол курдук, биһиги эрэдээксийэбит ытык бэтэрээннэрбит биир, ол эрэн олус суолталаах баҕа санааларын толорор сыаллаах бырайыагы саҕалыыр.
Крым олохтооҕо Ярослав Селютин диэн үтүө санаалаах ыччат «Мечта ветерана» диэн олус көдьүүстээх, бэтэрээн баҕа санаатын толорорго туһуламмыт Арассыыйаҕа анал бырайыагы толкуйдаан, онно анаан сайт арыйан үлэлэтэр. Кини бу сайтыгар дойдубут араас муннуктарыттан бэтэрээннэр ыра санааларын толорор иһин анал счетка ким төһөнү ыытарынан үп хомуйар. Ярослав Селютин ол үлэтин бүүс-бүтүннүү сайтыгар отчуоттуур, көрдөрөр. Кини үгүстүк сэрии бэтэрээннэрин кытта алтыспыт, көмөлөспүт уол эбит. Араас киһи араас кыһалҕалаахтык олорорун көрөн, саатар биир түгэҥҥэ көмөлөһөр санаа ылыммыт. Онно биһиги эмиэ кыттыһабыт уонна биир дойдулаахтарбытын бу ылыммыт бырайыакпытын өйүүргүтүгэр, күүс-көмө буоларгытыгар ыҥырабыт. Биһиги бырайыакпыт чэрчитинэн, баҕа санааларынан кыттыспыт сэрии бэтэрээннэригэр II Лөгөй олохтооҕор Василий Ананьевич ВАСИЛЬЕВКА уонна Найахы нэһилиэгин олохтооҕор Николай Николаевич ИВАНОВКА олохторо-дьаһахтара тупсарыгар туһуламмыт көмөҕө үлэлэһиэхпит. Бу көмөбүт чэрчитинэн, киирбит үп барыта отчуоттанарыттан саҕалаан, ыра санаа туолуор диэри биһиги эрэдээксийэбит ону хонтуруоллуур, ааҕааччыларбытыгар сырдатар соруктаахпыт. Эйэлээх олоҕу бэлэхтээн, оччоттон баччаҕа диэри үүнэ-сайда олорор суолбутун тэлбит ытык бэтэрээннэрбит биир ыра санаалара туолан, үөрүүнэн туолбут харахтарын көрөр баҕабыт олоххо киирдин!

                                                                                                                                                                                                                                                                                                                                 Ольга ШЕПЕЛЕВА.

                                                                                                                                                                                                                                                                                                                                   @muru.sahargata