(1923-1942)

1923 сыллаахха Баатаҕай нэһилиэгэр төрөөбүтэ. Аҕата Карпов Петр Иванович, ийэтэ Карпова Евдокия Ивановна. Чараӊай оскуолатын 7 кылааһын 1941 сыл сааһыгар бүтэрбитэ. Сэриилэһэр аармыйаҕа Чурапчы военкоматынан 1941 сыллаахха атырдьах ыйын 15 күнүгэр ыӊырыллыбыт. Алтайскай кыраайга Вийск куоракка младшай командир курстарыгар үөрэнэ сылдьан 1942 сыллаахха фроӊӊа барбыт. 1942 сыллаахха өлбүт. Ханна өлбүтэ, көмүллүбүтэ  биллибэт.

«Таптыыр дьонум Петр, Евдокия Карповтар дорооболоруӊ!  Мин ааппыттан  кыра тыллаах сурукта тутуӊ. Дьэ, мин бу ый 1 күнүгэр Иркутскайга үөрэнэ бардым. Ону барбытым кэннэ ытаан да төнүннэрбэккит, онон бөҕөтүк санааӊ уолгут Аҕа дойдутун иһин Кыһыл Армияҕа бардаҕа диэн, Чэркиэс барбат, онон төрөппүт сүрэххит син биир баар, ханна да буолларбын сатанарынан сурук ыытыам. Табыллыбат буоллаххытына Чэркиэскэ киирэн олоруӊ, мин диэки кытаанахтык санааӊ. Мин курдук оҕо ийэ дойдутун иһин өстөөх утары бардыбыт, онон ыстаал да сэниэҕитин эһимэӊ, оӊоруум оннук буоллаҕа дии. Бачча тухары бүөбэйдээн улаатыннаран кээспиккитигэр махталбын ылыӊ.

Онон биир бөҕө санааны  ылыӊ. Мин убайбын кытта үөрэн-көтөн араҕыстым, онон дьоллоохтук олоруӊ. Судаарыстыба иннигэр биир уол оҕону биэрбиккитигэр,  судаарыстыба махтанар. Бэйэм курдук хаартыскабын көрө  сылдьыӊ, олох ытаһымаӊ, мин истиэм син.  Убайым  ис таӊас харчыта көмөлөстө.

Быраһаайдарыӊ аҕалаах ийэм, кэриэс тылбын ылыӊ!»