Прудецкай Константин Кузьмич

:
Дата и место рождения :
  • 1916, Батагайский наслег
Дата и место призыва:
  • 01 сентября 1941 г., Чурапчинский РВК
Место службы: Западный фронт
Дата выбытия: 16 сентября 1944 г.
Звание в котором закончил войну: лейтенант гвардии, командир стрелкового взвода 121 гвардейского стрелкового полка 43 гвардейской стрелковой дивизии
Причина выбытия: убит на поле боя
Первичное место захоронения: на хуторе Пульти Колснаваской волости Мадонского уезда Латвийской ССР
Награды: орденами «Отечественная война II степени» (посмертно) 05.10.1944 г.; «Красная звезда».

(1916-1944)

1917 сыллаахха Дүпсүн улууһугар Бугуйас аҕатын ууһугар «Хоӊор Биэ» диэн сиргэ төрөөбүтэ. Кэлин I Ѳспөх нэһилиэгэ Чапаев аатынан колхоз буолбута. Ити нэһилиэккэ совет секретарынан үлэлии сылдьан 1941 сыллаахха атырдьах ыйын бүтүүтэ армияҕа барбыта. Ийэтэ – Березкина Матрена Петровна, аҕата Прудецкай Кузьма Яковлевич, соҕотох оҕолоро этэ. Кини кыра эрдэҕинэ аҕата өлбүтэ. Онтон Костя 10-ча саастаах эрдэҕинэ ийэтэ огдообо биир оҕолоох киһиэхэ кэргэн тахсыбыта. Онон икки тэӊ уоллаах ыал буолтара. Уолаттар иккиэн 1928 сыллаахха Дүпсүн сэттэ кылаастаах оскуолатыгар үөрэнэ киирбиттэрэ. Оччолорго ити оскуола ШКМ дэнэр үһү. Костя ити оскуоланы 1935 сыллаахха ситиһиилээхтик бүтэрбитэ. Оччотооҕуга саӊа тэриллибит  колхозка биир активнай ыччат этэ. Бэйэтин тэӊнээхтэриттэн туохха барытыгар хаалсыбат этэ. Костя үрдүк көнө уӊуохтааҕа, ис киирбэх дьүһүннээҕэ, элбэх саӊалааҕа. Куруук үөрэ-көтө сылдьара, эйэҕэс майгылааҕа. Костя дьиэ үлэтигэр олус дьоҕурдааҕа, кини сатаабатаҕа диэн суох буолара. 1936-37 сс. бөдөӊсүйбүт «Хоӊор Биэ» колхозка улахан дьону үөрэтэр оскуолаҕа учууталлаабыта. Күнүһүн колхозка үлэлиирэ, киэһэтин үөрэтэрэ. 1938-39 сс. Бороҕоӊӊо киирэн үп салаатыгар госдоход инспекторынан үлэлээбитэ. 1940 сыл саӊатыгар I Ѳспөх нэһилиэгэр Остуойка диэн сиргэ улахан дьону үөрэтэ сылдьыбыта. Онтон 1941 сыллаахха I Ѳспөх советын секретарынан үлэлии сылдьан, атырдьах ыйын бүтүүтүгэр армияҕа ыӊырыллыбыта. Маӊнай Чита куоракка 3 аӊар ый үөрэнэн снайпер аатын ылбыта. Константин Кузьмич 1942 сыллаахха ыам ыйын 1 күнүгэр Москва таһынааҕы фроӊӊа сэриилэһэ киирбитэ, атырдьах ыйыгар маӊнайгы бааһырыытын ылан госпитальга киирэр. Ити кэмтэн ыла быыстала суох сэрии хонуутугар сылдьар. Барыта 5 төгүл бааһырар. Константин Кузьмич Москва фронуттан саҕалаан Латвия сиригэр тиийэн кырыыстаах өстөөхтөрү утары хорсуннук охсуһа сылдьан өлбүтэ. Кини фроӊӊа командирынан сылдьыбыт. Константин Кузьмич бэчээккэ сурулларынан тыыннааҕар Кыһыл сулус орденынан наҕараадаламмыт. Ити наҕараада хаһан анаммыта биллибэт, дьонугар кэлбэтэх. Иккис наҕараадата «Бойобуой үтүөлэрин иһин» 130-с стрелковай Латынскай корпус бирикээһинэн 1944 сыл алтынньы 18 күнүгэр Аҕа дойду сэриитин  II степеннээх орденынан наҕараадаламмыт. Ити орден Константин Кузьмич өлбүтүн кэннэ анаммыта. Балаҕан ыйын 13 күнүгэр хорсуттар охтууларынан сэрии хонуутугар өлбүт.