(1903-1944)
Романов Николай Иванович (Бөчөй) Дүпсүн улууһун II Ѳспөх нэһилиэгин «Үөнэ» аҕатын ууһугар 1903 сыллаахха тыа дьадаӊы ыалыгар төрөөбүтэ. Аҕата – Романов Иван Прокопьевич сүөһү иитиитинэн дьарыктаммыт, 1922 сыллаахха өлбүт. Бииргэ төрөөбүт быраата Романов Иван Иванович 1928 сыл эргиэнинэн дьарыктанан быыбардыыр бырааба быһылла сылдьан баран, 1931 сыл сотуллар. Аҕатын аймахтара Романовтар: Арыыска аҕата Григорий, Романов Михаил (Баҕыһах), Романов Петр Гермагенович – прораб оҕонньор этилэр. Ийэтинэн аймахтара биллибэт. Кини төрөөбүт алааһа Сыгыннаах Халдьаайыта (сороҕор Макар уолун сирэ дииллэр). Аҕата эдэр сааһыгар икки хараҕынан көрбөт буолбут. Николай ликбезка үөрэнэн ааҕар, суруйар буолар. 1928 сылга диэри тыа хаһаайыстыбатыгар араас үлэлэргэ үлэлиир. Коммунистар Гуляев Петр Николаевич, Новгородов Алексей Алексеевич уонна Емельянов Николай Семенович рекомендацияларынан атырдьах ыйын 19 күнүгэр 1930 сыллаахха БСК (б) П кэккэтигэр ылыллар.
1928-29 сылларга ата бэргээн 1942 сыллаахха госпитальга сырдык тыына быстыбыт, өлбүтүн туһунан дьонугар биллэрии кэлбит. Дүпсүн улууһун II Ѳспөх нэһилиэгэр совет председателинэн үлэлээбитэ. Онтон салгыы Дүпсүн улууһун ситэриилээх комитетын солбуйар председателинэн, үп салаатын сэбиэдиссэйинэн үлэлиир. 1930 сыллаахха Уус-Алдан оройуонун тэрээһин мунньаҕар райсовет председателинэн талыллар. 1930 сыллаахха балаҕан ыйыгар эдэр үүнэр кыахтаах кадры партийнай оскуолаҕа үөрэххэ ыыталлар. Партийнай оскуолаҕа үөрэнэ сылдьан партийнай тэрилтэ секретарынан уонна профсоюз комитетын председателинэн талыллан үлэлиир. 1934 сыллаахха советскай – партийнай оскуоланы үөрэнэн бүтэрэр. Сэрии иннинэ 1933-39 сс. Анаабыр райсоветын председателинэн үлэлээбитэ. Онтон салгыы Саха сиринээҕи түүлээх заготовкатын уполномоченнайынан, Токо оройуонугар райсовет отделын сэбиэдиссэйинэн үлэлээбитэ. Саха АССР 8 ыӊырыылаах съезтэрин делегатынан уонна киин ситэриилээх комитетын Пленумун чилиэнинэн талыллан үлэлии сылдьыбыта.
Онтон 1941 сыл бэс ыйыгар армияҕа ыӊырыллыбыта. Чита куоракка тиийэн байыаннай үөрэххэ үөрэммитэ, онтон уоттаах сэриигэ фроӊӊа барбыта. Харьков куораты босхолооһуӊӊа сэриилэһэ сылдьан 1944 сыллаахха сураҕа суох сүппүтэ.
Савва, Николай Алексеевтар эдьиийдэрин кэргэн ылбыта, онтон уола Романов Артем диэн. Кэнники алын Бэстээххэ лесхозка үлэлии сылдьыбыта. Нуучча кыыһа кэргэннээх дииллэрэ.