(1909-1983)
"Мин Аҕа дойдуну көмүскүүр сэриигэ 36 сааспар 1942 сыллаахха бэс ыйын 25 күнүгэр Чурапчы оройуонун райвоенкоматынан ыӊырыллан армияҕа барбытым. Тохтоло суох айаннаан Челябинскай куоракка тиийэн 7 ый байыаннай дьыалаҕа үөрэммитим. Үөрэхпин бүтэрээт да II-с Украинскай фронт 19-с стрелковай пуолкатыгар автоматчигынан түбэспитим. Ити 1943 сыл тохсунньу ый бүтүүтэ этэ. Ити Кыһыл Армия хаанырбыт өстөөх гитлеровскай армиятыгар ыар охсууну оӊорон арҕаа төттөрү үтэйэр кэмэ саҕаланар күүстээх кимэн киирии бириэмэтэ этэ. Ити курдук сыл устата өстөөҕү утары хаан тохтуулаах хабыр киирсиилэр түмүктэригэр мин 9-с төгүллээх кырыктаах кыргыһыыларга кыттан баран, 9-с төгүллээх кимэн киириилээх сэриигэ өстөөх гранататын оскуолката уӊа атахпын тосту көтөн сэрии хонуутугар охто сыттахпына улуу нуучча омугун уолаттара соҕотохтуу хаалларбакка төттөрү илдьэ тахсыбыттара. 1945 сыл тохсунньу 15 күнүттэн 29 күнүгэр дылы күннэри-түүннэри тохтоло суох өстөөҕү чугутан, бэйэтин арҕаҕар Берлин куоракка тиийэрбит 4 көстөөх сир хаалбытын кэннэ этэ. Ити бүтэһик сэриигэ киирэр кэммэр эбэтэр 1945 сыл тохсунньу 29 күнүгэр биһиги дивизиябыт командира түүн халлаан сырдыан иннинэ өстөөх бөҕөргөтүнэн сытар сирин былаанын билиһиннэрбитэ. Ханнык эрэ үрэх дуу, кыра өрүс эбитэ дуу. Биһиги полкабыт ол үрэҕи туораан өстөөх бөҕөргөтүнэн сытар сирин көӊү көтөн киириэхтээх этибит. Ѳр-өтөр буолбатаҕа, «Атаакаҕа!» - диэн командир бирикээстиирин кытта ким туох сэптээҕинэн ыта-ыта иннибит диэки киирэн испиппит, били үрэх үрдүгэр кэлбиппит, сыыр хааһа туруору баҕайы сорох сирдэринэн икки-түөрт миэтирэ үрдүктээх этэ, сэриигэ туруору-сытыары диэн буолбакка бирикээһи эрэ толоруллуохтаах, биһиги үс буолан аан бастаан үрэххэ ыстанан киирэн харбаан туораан баран ытыалаһа сыппыппыт. Ити үрэҕи эбэтэр өрүһү туорааһыӊӊа биһиги полкабыт дьоно өстөөх буулдьатыттан үгүстэрэ охтубут этилэр. Мин ити сэрии хонуутуттан нэһиилэ сыыллан кыра оӊочону булан сыттахпына санитардар ылбыттара. Миигин Викси диэн куорат госпиталыгар киллэрбиттэрэ, онно 8 ый эмтээн баран 2-с группалаах инвалид оӊорон дойдубар атаарбыттара. Аҕа дойду көмүскэлин ыар сэриитигэр олоҕу да умнан туран кыргыспыт түмүктэрим диэн Албан аат III степеннээх орденынан, Аҕа дойду сэриитин 6 бойобуой медалларынан наҕараадаламмытым буолар. Төрөөбүт Сахам сирин Нам оройуонугар 1945 сыл балаҕан ыйын 15 күнүгэр кэлбитим. Сэрииттэн үлэлиир дьоҕурбун сүтэрэн кэлбитим, онтон ыла ыарыһах буолан 30 сыл устата дьиэҕэ олоробун, кыыстаахпын, күтүөттээхпин уонна 4 кыра сиэннээхпин. Норуот, партия, Ийэ дойдум иһин ытык иэспин чиэстээхтик толорон бар дьонум эрэлин түһэн биэрбэтэҕим..."
Сидоров Исак Афанасьевич ахтыы суругуттан
1975 сыл кулун тутар 3 күнэ