Тусахов Дмитрий Егорович

:
Дата и место рождения :
  • 07 ноября 1924 г., Батагайский наслег
Дата и место призыва:
  • 16 июня 1943 г.,
Место службы: Восточный фронт
Дата выбытия: Май, 1948 г.
Звание в котором закончил войну: ефрейтор роты связи 34-го дорожного полка
Причина выбытия: Демобилизация
Награды: орденами Славы III степени; Отечественная война I степени; медалью «За победу над Японией».

(1924-1994)

Дмитрий Егорович 1924 сыллаахха сэтинньи 7 күнүгэр Баатаҕай нэһилиэгэр төрөөбүтэ. 1939 сылтан 1943 сыл бэс ыйын 12 күнүгэр диэри колхозка үлэлээбит. Чараӊай 7 кылаастаах оскуолатын бүтэрбит. Байыаннай званиета: ефрейтор. Кэнники милиция майора буолбут.

 «Дьиӊинэн мин 1924 сыллаахха сэтинньи 7 күнүгэр  Миитэрэйэп таӊара күн төрөөбүтүм. Онно 1942 сыл сайын 1924 сыллаах төрүөхтэр армияҕа барыыларыгар барсан иһэн, Дьокуускайга областной военкомакка хат комиссияланан, сэттис кылааһы бииргэ үөрэнэн бүтэрбит табаарыспынаан Тарскай Николай Николаевичтыын кыраларбыт бэрт буолан отсрочкаҕа дойдубутугар төннүбүппүт. Кини учууталлыы Тандатыгар төннүбүтэ, мин Чараӊайга күнүгэр Маркс аатынан колхозка булчутунан уонна араас үлэҕэ сылдьан кыстаабытым. Онтон 1925 сыллаах төрүөхтэр армияҕа барыыларыгар 1943 сыл бэс ыйын 16 күнүгэр ыӊырыллан армияҕа барбытым. Онно даҕаны оҕолорбут бэрт буолан, эдэрдэри наар Монголияҕа ыыппыттара. Ол тиийэн Чойбалсан куоракка 34-с дорожнай полкаҕа регулировщиктар роталарыгар, онтон сибээс ротатыгар сылдьан байыаннай  үөрэххэ үөрэммитим. Ити сылга тимир суол слаатын тутуутугар, от үлэтигэр, сүөһү манааһыныгар, буор үлэлэригэр элбэхтик үлэлээбиппит. Япония сэриитэ саҕаланарыгар Тамсаг-Булак диэн станцияҕа телефониһынан үлэлээбитим. Онтон бастакы фроннар сэрииһиттэрэ ааспыттарын кэннэ, биһигини эмиэ фроӊӊа ыыппыттара. Онно ис Монголияннан Маньчжурия территориятыгар Калган куорат таһыгар тиийэн олорон, түүн өстөөх партизанскай этэрээттэрин ытыалааһыӊӊа кыттыыны ылбытым, бааһырыы суох этэ. Онтон сотору капитуляция буолбут, сэрии бүппүт диэн салют бөҕөнү ыппыппыт уонна Монголиябытыгар төннөн кэлбиппит. Онтон салгыы сулууспам Улан-Баторга, Хабаровскайга, Горьковскай, Томскай, Владимировскай уобаластарга буолбута. Онно Хабаровскайга сержантскай оскуолаҕа үөрэммитим. Ити курдук 5 сыл уоппуската суох сулууспалаан баран 1948 сыл ыам ыйыгар демобилизацияланан Дьокуускайга кэлбитим уонна үргүлдьү милицияҕа киирэн, Омскайга тиийэн икки сыллаах оперативнай училищены 1950 сыллаахха бүтэрэн кэлэн милицияҕа үлэлээбитим», - диэн ефрейтор, милиция майора Д.Е.Тусахов бэйэтин ахтыытыгар суруйбута.

Аҕа дойду сэриитин I степеннээх, Албан Аат III степеннээх орденнарынан, «Японияны кыайыы иһин» мэтээлинэн наҕараадаламмыта. 1994 сыллаахха өлбүтэ.