Лазарев Кондратий Иванович

1908 сыллаахха Дэлэки диэн алааска Маайака уонна Уйбаан Лазаревтарга иккис оҕонон төрөөбүт.

1929 сыллаахха ликбезкэ үөрэнэн көҥүл ааҕар, суруйар буолбут.

1935 сылтан «Кыһыл Хардыы» колхозка бастаан кыладыапсыгынан, онтон кыстыкка ферма сэбиэдиссэйинэн салайар үлэҕэ сүрэхтэнэн үлэлээн барбыт.

 1940 сыллаахха компартия кэккэтигэр киирбит уонна бу сыл колхоз председателинэн талыллан үлэлээбит.

1942 сылллаахха бэбиэскэ тутан тас Монголияҕа тиийэн резервнэй армия байыаһа буолбут. Манна байыаннай үөрэҕи барбыт. Онтон саастаах аҕыйах байыаһы, олохтоох леспромхозка охраннай чааска ыыппыттар. Бу чааска сыл курдук сулууспалаабытын кэннэ 1943 сыллаахха Бурят-Монголияҕа фроҥҥа таһаҕас таһыытыгар биир дойдулааҕа Пухов Василий Васильевиһы кытта биир чааска сулууспалаабыт. 1944 сыллаахха кинилэр чаастарын Иркутскай уобаласка тимир суол станциятыгар инники линияҕа ыппыттар. Манна сылтан ордук кэмҥэ үлэлээбит уонна 1945 сыллаахха ахсынньы ыйга демобилизацияланан дойдутугар барбыт.

Онтон ыла коммунист К.И.Лазарев колхозка, совхозка 36 сыл утстата председателинэн, биригэдьииринэн, ферма сэбиэдиссэйинэн, рабочайынан үтүө суобастаахтык үлэлээбит.

Сэрии кыттыылааҕа Уус-Алдан улууһун, Курбуһах нэһилиэгин «Бочуоттаах гражданина», колхознай, совхознай тутуу ветерана Кондратий Иванович 1979 сыллаахха ыарахан ыарыытыттан олохтон туораабыта. Кини икки кэргэниттэн 8 оҕону төрөтөн, улаатыннаран, үөрэттэрэн ыал оҥортообут. Билигин 8 оҕотуттан-21 сиэн, 19 хос сиэн бааллар. Онтон 16 киһи үрдүк үөрэхтээх, уоннааҕылара орто анал үөрэхтээх дьон буолан эһэлэрин олоҕун салҕаан үлэлии-хамсыы сылдьаллар.