1920 с. II Байаҕантай нэһилиэгэр төрөөбүт, Чурапчы ОВК-н ыҥырыллыбыт, 87 СД, 1382 СП рядовойа, 27.07.43 сыллаахха өлбүт, Украинаҕа Луганскай уоб. Красная Поляна сэл. көмүллүбүт.

АЛЕКСЕЕВА МАРИЯ КОНСТАНТИНОВНА

Уус-Алдан улууһун Дүпсүн нэһилиэгэр 1929 сыллаахха Алексеевтар дьиэ кэргэттэригэр төрөөбүтэ.

Урукку олох охсуутугар эрдэ тулаайах хаалбыта. Аймохтарыгар эҥэрдэһэн оҕо сааһыттан кыһалҕаны билэ улааппыта.

Борогоҥҥо кирпииччэ собуотугар үлэлии сылдьан 1950 с. промкомбинаткак үлэлиир Бүөтүр Маппыайапка кэргэн тахсан Тиит-Арыыга олохсуйан, дьиэ-уот туттан, сүөһү ииттэн, элбэх оҕолонон бэрт үчүгэйдик олорбуттара.

Эбээбит Мария ыраас туттуулаах, эйэҕэс майгылаах киһи этэ.. кини элбэх оҕолоох буолан оҕолорун көрөн-харайан, таҥастарын-саптарын, астарын-үөллэрин бэрийэн хоп курдук олорбуттара.

Мария Константиновна 2 кыыс, 6 уол күн күбэй ийэтэ, элбэх сиэн эйэҕэс эбэтэ.

АХТЫЫ.

А5абыт Аргунов Иннокентий Васильевич 1931 сыллаахха Верхоянскай оройуонун Сартан нэһилиэгэр төрөөбүт. Биир сааһыгар атынан, табанан көһөн кэлбиттэр манна убайа Бүөтүр 5 саастааҕар икки оҕону илдьэ. Сэрии уот кураан сылларыгар Баттахха олорбуттар, элбэх эрэйи, кыһалҕаны, хоргуйууну билэн улааппыттар. Үөрэҕэ 6 кылаас этэ. 13 сааһыттан холкуос үлэтигэр эриллэн үлэлээн барбыт. Оҕус сиэтиититтэн саҕалаан от-мас үлэтигэр, сүөһү көрүүтүгэр, кэлин кыладыапсыгынан, от звенотугар звеноводунан үлэлээбит.

Пенсияҕа тахсан да баран хотон харабылынан, убаһа аһатыытыгар үлэлээбит.

Тыыл, үлэ ветерана, нэһилиэк бочуоттаах олохтооҕо. 2015 сыллаахха 84 сааһыгар өлбүтэ.

Аҕата Аргунов Василий Николаевич (Дыдаа), ийэтэ Аргунова Матрена Михайловна. Бииргэ төрөөбүттэр алтыалар этэ. Билигин биир быраата Аргунов В.В. эрэ баар. Оҕолоро 4-лэр. Бары үөрэхтэнэн үлэһит, ыал буолбуттара. Элбэх сиэн, хос сиэннэр кинилэр олохторун салгыыллар.

Ийэбит Аргунова Мария Семеновна 1934 сыллаахха Бээрийэ нэһилиэгэр төрөөбүт. Сэрии сылларыгар Түүлээх нэһилиэгэр аҕалара өрүскэ балыкка үлэлээн тыыннаах хаалбыппыт диэн ийэбит кэпсиирэ.

Манна 1956 сыллаахха кийиит буолан кэлиэҕиттэн сүөһү көрөөччүнэн, доярканан үлэлээбит. 1969 сылтан 1979 сылга диэри детсадка повардаабыта. Үлэтин Бээрийэҕэ үүт астааччынан саҕалаабыт. Түөрт эрэ кылаас үөрэхтээх этэ. Бииргэ төрөөбүттэр бэһиэлэр эбит. Аҕалара оҕолор кыра эрдэхтэринэ өлбүт. Аҕалара Охлопков Семен Яковлевич, ийэлэрэ Бережнева Февронья Кирилловна диэн эбиттэр.

Аҕабынаан 8 оҕону төрөппүттэриттэн 4 оҕо улаатан үөрэхтэнэн бары ыал буолан, оҕолонон олороллор. Уонча сиэн, уонтан тахса хос сиэн бааллар.

2016 сыллаахха 82 сааһыгар өлбүтэ. Тыыл, үлэ ветерана, нэьилиэк бочуоттаах олохтооҕо.

Суруйда кыыстара

үлэ ветерана, нэһилиэк бочуоттаах олохтооҕо

Саввина Елена Иннокентьевна. 

Егоров Николай Терентьевич

Тэрэнтэйэбис, эрдэ тулаайах хаалан, оскуолаҕа үөрэммэтэҕэ. Оҕо сааһыгар атаҕын тобугун таһааран, онтуката кыайан киирбэккэ, доҕолоҥноон хаамара. Кыра эрдэҕиттэн холкуос араас үлэтигэр сылдьара, сайын от мустарара. Мин Ньукулайдыын икки сайын от мустарыытыгар сылдьыспытым. Сүрдээх көнө, ээҕи кытта сылдьар киһи этэ. Ырааҕынан аймахтарыгар эҥэрдэһэн олорбута. Атахтааҕа буоллар, кыайыгас-хотугас, күүс да баар быһыылааҕа, илиитигэр кыанар этэ. Сөп соҕус орто уҥуохтааҕа, халыҥ киппэ эттээҕэ-сииннээҕэ. Кыра соҕус былдьыры саҥалааҕа.

Сааһыран иһэн, бөһүөлэккэ ыаллыы олорор хас да оҕолоох Турантаева Анна Николаевнаны  кэргэн ылбыта, онтон увол оҕо төрөөбүтэ, ону аҕатын аатынан Тэрэнтэй диэн ааттаабыта. Үчүгэй баҕайытык олорбуттара. Тэрэнтэйэбис, оҕо эрдэҕиттэн айылҕаны кытта алтыспыт буолан дуу, айылҕаттан бэриллибит талаанынан дуу самыыры-хаары, күнү-дьылы сүрдээх табатык этэр дьоҕурдааҕа. Сылыксыт идэлээҕэ. Бииргэ сылдьар дьоно сөҕөн арааһы кэпсээччилэр. Дойдутун сирин-уотун олус үчүгэйдик билэрэ. Кинини кытта сырыттаххына, мунар эҥин туһунан санаа суох буолара.

Биир күһүн аттан бырахтаран, сыһыыга соҕотох сылдьан, таһырдьа хонон, тымныйан күүскэ ыалдьыбыта, онтон өрүттүбэккэ өлбүтэ. Уола Тэрэнтэй Чурапчыга кэргэн ылан, оҕолонон, сүөһү-ас ииттэн бэркэ олорор. Киниэхэ, саастаах киһи быһыытынан, барыта этэҥҥэ буоллун диэн алгыспын аныыбын.

Ахтыыны суруйда Егоров Николай Николаевич – тыыл, үлэ ветерана.