Жирков Михаил Васильевич (1912-1967)
Бээрийэҕэ Лабачааны үрэҕэр Бырыы диэн сиргэ төрөөбүтэ. Бырыы 1935 сылга диэри Өнөр нэhилиэгэр киирсэрэ. Дьонноро: Василий Михайлович, (Копырина) Прасковья Гаврильевна Жирковтар. Түүлээх нэһилиэгин начальнай оскуолатын бүтэрэн, оччотооҕу кэм ирдэбилинэн ой- бодуо үөрэхтэнэн, холкутук ааҕар, суруйар буолбута. Дойдуга Сэбиэскэй былаас букатыннаахтык олохтонон, ханна да бааһынайдары холбоһуктааһын саҕаламмыт кэмэ этэ. Михаил бу үлэҕэ актыыбынайдык кыттан, Лабачааныга “Хаастаахха” кииннээн “Туос табаарыстыбаны” тэрийсибитэ. Кини биир бастыкынан дьонун бу табаарыстыбаҕа чилиэнинэн киллэрбитэ. Биир ыанар ынаҕы, атыыр, ат оҕустары, биир аты холбуур, ону таһынан сыарҕа, өтүү, араас туттар тэриллэри туттартыыр. Онон бэйэтин холобурунан, атын ыаллары бу табаарыстыбаҕа чилиэнинэн киирэллэригэр угуйар. Табаарыстыба бастакы суоччутунан кинини талаллар. Кэлин бу тэриллибит Туос табаарыстыбалары холботолоон Бээрийэ нэһилиэгэр икки колхоз тэриллэр Бээрийэҕэ кииннээн “Туругурдуу” , Тоноҕоско кииннээн “Буденнай” колхозтар. Буденнай колхозка Михаил Жиркову эмиэ суоччут бухгалтерынан талаллар. Үлэ-хамнас үөһүгэр сырыттаҕына иккис Аҕа дойду улуу сэриитэ саҕаланар, онон бастакы хомуурга түбэһэн сэриигэ аттанар. Кини иккис аан дойду сэриитин саамай уодаһыннаах, элбэх хаан тохтуулаах улахан кыргыһыытынан ааҕыллар Курскай тоҕойго 134-с стрелковай полкаҕа сэриилэспитэ. Үстэ субуруччу илиитигэр, атаҕар ыараханнык бааһыран сэрии инбэлиитэ буолан, дойдутугар эргиллибит. Сэрии алдьархайын, иэдээнин туһунан кэпсииригэр биир түбэлтэни ордук чорботон ахтара. Ол курдук кинилэр чаастара улахан сис тыаны быһа түһэр сорудаҕы ылан, баран истэхтэринэ, эмискэ элбэх ахсааннаах ньиэмэс самолеттарын буомбалааһыныгар түбэспиттэр. "Сэриигэ сылдьыбытым устата, онтон ордук ынырык, хаан тохтуулаах киирсиини билбэтэҕим" - диирэ. Туох да өй-мэйдээх тулуйбат тыаһа-ууһа, сир биир кэм титирэстээн, иҥнэннээн олороро. Буомбалар ыраас сири бирээмэ ордорбот гына чаастатык түһэллэриттэн, тулабыт дэлби тэбии, күөрэ-лаҥкы барыы омуһахтарыгар кубулуйбута. Мин өллүм дии санаан, буомбалар ыһар буордарыгар сабыллан, онно баттатан балачча кэм тыыннаахпын, өлбүппүн билбэккэ кэриэтэ сыттым. Самолеттар сүүрбэччэни эрэ кыайбат мүнүүтэ буомбалаан баран, бардылар быһыылаах, эмискэ уу-чуумпу буолан хаалла. Мин буору сүргэйэн тураары гыммытым, арай хаҥас атаҕым үктэннэрбэт, саппыкым иһэ тобус толору хаан быһыылаах. Бу үлүгэрдээх буомбалааһыҥҥа киһи да дуоннаах оппото ини дии санаабытым, хата онтон-мантан , тыа быыһынан дьон биир-биир туруталаан бардылар, киһи да бөҕө өлбүтэ быһыылаах.
1943 сыллаахха сэрии инбэлиитэ буолан, Слава – 3 степпэннээх уордьанынан наҕараадаланан, этэҥҥэ эргиллэн кэлэн, Бээрийэ нэһилиэгин сэбиэтин бэрэссэдээтэлинэн талыллан үлэлиир.
1947 уонна 1950 сылларга икки төгүл Бээрийэ нэһилиэгин сэбиэтигэр депутатынан талыллыбыта. Кэлин 1960 сыллаахха Дьокуускайга почта начальниктарын бэлэмниир үс ыйдаах кууруска үөрэнэн Дүпсүн нэһилиэгэр почта начальнигынан ананан үлэлээбитэ. Кылгас кэм иһигэр почтатын үчүгэй үлэлээх өрөспүүбүлүкэ почталарын отделениеларын ахсааныгар эрэллээхтик киллэрбитэ.
Отутус сыллар саҕаланыыларыгар Тоноҕоско олорор Васильев Иван Петрович диэн киһи кыыһын Васильева Варвара Ивановнаны кэргэн ылан түөрт оҕоломмуттара: Михаил, Мария, Иван, Василий.
