Калининский Иннокентий Васильевич (1899-1957)

      1899 сыллаахха Тандинскай нэһилиэгэр Василий Михайлович—Сөкүөрүйэ уонна Ольга Калининскайдар диэн дьадаҥы ыалга төрөөбүт. Эдэр сааһыттан хара үлэҕэ эриллэн улааппыта. Өлүөхүмэҕэ, Моой Үрэххэ, Сиэгэҥҥэ, Охотскай перевозка, Ааллаах-Үүҥҥэ таһаҕас таһыытыгар «Табалаах» колхозтан үгүстүк сылдьыбыта.

1942 сыл саас айантан кэлэн баран бэс ыйыгар Күөрүмэ сайылыктан армияҕа аттаммыта. Фроҥҥа сылдьан дьонугар, бэйэтэ үөрэҕэ суох буолан дьоҥҥо суруйтаран, сурук ыытара: «08.08.43 с... Трофейной ротаҕа баарбын, тимири хомуйабыт. Бу үлэбэр 100 солкуобай бириэмийэ ыллым. Немецтэри кытта ыаллыы кыстаатым. Күннэри-түүннэри быыстала суох ытыалаһабыт».

«25.02.44с. Күндү кэргэним Татьяна Яковлевна уонна уолум Кеша! Мин үчүгэйдик сылдьабын. Сулууспа да үчүгэйдик барар. Мин туспунан санаарҕаамаҥ. Хаан тохтуулаах сэрии сотору бүтүөҕэ. Биһиги син уруккубутун курдук бииргэ олоруохпут... Үрдук правительственной наҕарааданы «Бойобуой үтүөлэрин иһин» медалынан наҕараадаламмыппын биллэрэбин». Кини фронтан суруйбут 14 суруга Танда музейын фондатыгар бааллар.

Фронтан 1945 сыл күһүн Клайпеда куораттан төннүбүтэ. Олох тупсарын туһугар күүһүн-күдэҕин харыстаабакка, сыратын-сылбатын биэрэн туран Партизан Егоров аатынан колхоз бырабылыанньатын председателинэн үлэлээбитэ. 1957 сыллаахха өлбүт.

Кэргэнэ татьяна Яковлевналыын 1929 сыллаахха холбоспуттар. Иннокентий диэн уоллара 3 уоллаах уонна кыыстаах, элбэх сиэннээх, хос сиэннэрдээх.