Калининский Роман Евсеевич (1900-1973)

      1900 сыллаахха Тандинскай нэһилиэгэр төрөөбүт. Аҕата Евсей Кузьмич, ийэтэ Иванова Анастасия Самсоновна Мохсоҕоллооххо сыыр үрдүгэр тыа солоон дьиэ туттан лорбуттар. Сайылыктара Күөрүмэ этэ. 3 уол, 2 кыыс оҕолоохторо. Улахан Егор куоракка семинарияҕа үөрэнэ сылдьан сэрии иннинэ ыалдьан өлбүт. Кыргыттара Вера Чурапчы Кытаанаҕар Сидоровтарга, Марина Захаровтарга кийиит буолан барбыттар.

Роман Евсеевич «Табалаах» колхозка суоччутунан үлэлээбит. Чурапчы Сылаҥыттан Макарова Мария Ивановнаны кэргэн ылбыт. Эдьиийиттэн Маринаттан Захаров Егор диэн уолу ииппиттэр.

Роман Евсеевич ССКП чилиэнэ. 1942 сыллаахха армияҕа ынырыллыбыт. Брянскай фроҥҥа 20-с хайыһар биригээдэтигэр, I Украинскай фроҥҥа кыайыы буолуор диэри сэриилэспит. Штабка иистэнньэҥинэн уонна поварынан сылдьыбытын туһунан кэпсиирэ. Икки төгүл бааһырбыт. Сэриини Берлиҥҥэ түмүктэспит уонна 25.09.45 с. демобилизацияламмыт.

Танда музейыгар кини 1945 сыл олунньу ый 2 күнүгэр балтыгар Калининская Ульяна Афанасьевнаҕа суруйбут суруга баар онно: “Мин билигин сылдьыым доруобуйам учугэй. Үлэлиибин иккис поварынан... Биир тылынан эттэххэ бу иккис империалистический сэрии кэнниттэн тыыннаах ордон дойдуга тиийдэххэ ханна хайдах сылдьыбытым туһунан онно кэпсиэм. Билигин суруйарга время суох. Баара да буолла сатаммат. Военной закрет буолар ”.

Кини 1946 сыллаахха сэрииттэн эргиллэн кэлэн Бээрийэҕэ сельпо бухгалтерынан үлэлии барбыт. Онтон Мохсоҕоллооххо атыыһыттаабыт. 1949 сыллаахха Бороҕоҥҥо көһөн быткомбинакка таҥас быһааччынан, кэргэнэ Мария Ивановна иистэнньэҥинэн үлэлии киирбиттэр. 1958 сыллаахха Сылаҥтан Уля диэн кыыһы иитэ ылбыттар. Мохсоҕоллоохтон кулуба Калининскай дьиэтин көһөрөн Бороҕоҥҥо Ленин уулуссатын 69 №-гэр дьиэ туттан олорбуттар.

Роман Евсеевич «Бойобуой үтүөлэрин иһин», «Варшаваны босхолооһун иһин» медаллардаах.

1973 сыллаахха ыалдьан өлбүт.