Алексеев Петр Павлович (1924-2004)

     1924 сыллаахха кулун тутар 10 күнүгэр Сыҥаах нэһилиэгэр дьадаҥы бааһынай кэргэнигэр төрөөбүтэ. 7 сааһыгар бэйэтин нэһилиэгэр бастакы кылааска үөрэнэ киирбитэ. Салгыы Чараҥай сэттэ кылаастаах, Мүрү орто оскуолатыгар 9 кылааһы бүтэрбитэ. 1942 сыллаахха атырдьах ыйын 17 күнүгэр уоттаах сэриигэ ыҥырыллан, Монголия сиригэр турар, Армия генерала Плиев, Советскай Союз Геройа подполковник Бакаев командирдаах, 80-с мотострелковай полк 514-с отдельнай зенитнэй, артиллерийскай дивизиятыгар сулууспалыыр. Улахан Хинган хайатын уҥуордаан, Маньчжурия территориятыгар баар дэриэбинэлэри, куораттары өстөөх илиититтэн босхолоспута.

Кини суостаах сэриигэ буойун ытык иэһин чиэстээхтик толорбутун «Бойобуой үтүөлэрин иһин», «Японияны кыайыы иһин» мэтээллэр туоһулууллар. Кэлин Аҕа дойду сэриитин 2-с степеннээх орденынан, Монголия “Халкин-Гол” мэтээлинэн наҕараадаламмыта. Петр Павлович дойдутугар 1947 сыллаахха муус устар 23 күнүгэр эргиллэн кэлбитэ. Кэлээт да аны, олоҕу чөлүгэр түһэрэр күүрээннээх үлэҕэ кыттыбытынан барбыта. 1951 сыллаахха ахсынньы 20 күнүттэн Уус-Алдан райкомун рекомендациятынан учуутал үлэтигэр барбыта. 1956 сыллаахха Дьокуускайдааҕы педагогическай училищены кэтэхтэн үөрэнэн бүтэрбитэ. 1951-1969 сс. ахсынньы ыйга диэри оройуон иһигэр араас оскуолаларга: Сыырдаахха, Суоттуга, Мүрүгэ, Тумулга, Эрбэһиҥҥэ уонна Баатаҕайга учууталлаабыта, ити иһигэр 12 сыл начальнай оскуолаларга сэбиэдиссэйдээбитэ. 30 сыл устата эдэр ыччаты иитиигэ-үөрэтиигэ бары күүһүн-уоҕун ууран туран үлэлээбитэ. “РСФСР норуотун үөрэҕириитин туйгуна” знагынан бэлиэтэммитэ. Кини Баатаҕай нэһилиэгин Бочуоттаах олохтооҕо. 10 оҕо амарах аҕата этэ. 2004 сыллаахха өлбүтэ.