Барашков Петр Петрович (1910-1990)

     1910 сыллаахха от ыйын 10 күнүгэр II Суотту нэһилиэгэр Холболоох алааска төрөөбүтэ. 1926 сыллаахха Мүрү 7 кылаастаах оскуолатын бүтэрбитэ. Онтон Дьокуускайга II ступеннаах оскуоланы бүтэрэн баран, 1930 сылтан Чурапчы оройуонугар Хабаччы 4 кылаастаах оскуолатыгар учууталлаабыта. Нэһилиэк олоҕор актыбынайдык кыттар эдэр киһи учууталлыырын таһынан, «Комсомол» диэн сир оҥорор табаарыстыбаны тэрийэн, бастаан солбуйар председателинэн, кэлин председателинэн уонна суоччутунан тэҥҥэ үлэлээбитэ. 1933 сыллаахха Кытаанах оскуолатыгар сэбиэдиссэйдээбитэ. 1934-37 сылларга Дьокуускайга педрабфакка саха тылын, литературатын учууталынан ананан үлэлиир. 1937 сыл олунньу ыйтан П.А. Ойууну-кай ыҥырыытынан тылы, литератураны, историяны чинчийэр институкка научнай сотруднигынан ыҥырыллан хара өлүөр диэри үлэлээбитэ. Манна сылдьан пединституту кэтэхтэн үөрэнэн бүтэрэр.

1941 сыл от ыйын 25 күнүттэн 1945 сыл алтынньы 15 күнүгэр диэри Аҕа дойдуну көмүскүүр сэриигэ сылдьыбыта. Бастаан Монголия кыраныыссатыгар сулууспалаабыта. Онтон 1943 сыллаахха Арҕааҥҥы фроҥҥа тиийэн Белград куорат аннынааҕы улахан сэриигэ кыттар. Манна уҥа илиитигэр улаханнык бааһырар, онтон госпитальга сытан эмтэнэн баран салгыы сэриилэһэ айанныыр. Танкист. Младшай сержант. Кыайыыны Польша сиригэр көрсөр. Сэрииттэн төннөөт үлэлээбит институгар үлэтин салгыыр. 60-тан тахса научнай үлэлэр, ыстатыйалар автордара. 1949 сылтан ССКП чилиэнэ буолан элбэх общественнай ноҕоруускалардааҕа. Партбюро чилиэнэ, народнай хонтуруол председателэ. Аҕа дойду сэриитин 2-с степеннээх орденынан, «Бойобуой үтүөлэрин иһин», «Хорсунун иһин», «Германияны Кыайыы иһин», «1941-45 сс. Аҕа дойду Улуу сэриитин сылларыгар килбиэннээх үлэтин иһин» мэтээллэринэн, САССР Верховнай Сэбиэтин Бочуотунай Грамоталарынан наҕараадаламмыта. САССР культуратын үтүөлээх үлэһитэ. 1990 сыллаахха өлбүтэ. 5 оҕолоох.