Ефимов Петр Андреевич (1901-1979)

1901 сыллаахха Сыҥаах нэһилиэгэр дьадаҥы кэргэҥҥэ төрөөбүтэ. Үөрэҕэ суох. Сэриигэ 1942 сыллаахха ыҥырыллыбыта. Бастаан Нижне-Удинскайга кавалерияҕа уөрэммитэ. Японияны кытта сэрии кыттыылааҕа. Сэрииттэн кэлэн баран «Хардыы» колхозка хара үлэҕэ үлэлээбитэ. Олус үлэһитинэн биллэрэ. Ол курдук оҕуһунан уончалыы сыарҕа саһааны оройуоҥҥа киллэрэн райсовекка туттарара. Төннөрүгэр биир оччо куруҥаҕы эрбээн дьиэтигэр аҕалара. Кырдьан баран “Лена” совхозка кыһын аайы сылаас ойбону үлэлэтэрэ, эмээхсининээн мөлтөх туруктаах борооннору көрөрө. Ким да көмөтө суох 10х7 дьиэни туттубута. “Японияны кыайыы иһин”, “1941-1945 Аҕа дойду Улуу сэриитин сылларыгар килбиэннээх үлэтин иһин” мэтээллэринэн наҕараадаламмыт. Икки оҕотуттан уола эдэр сааһыгар өлбүт. Кыыһа Винокурова Матрена Петровна сааһын тухары Тумулга олорбута, элбэх оҕолоох. П.А. Ефимов 1979 сыллаахха өлбүтэ.