Новоприезжий Иван Карпович (1918-1988)

1918 сыллаахха II Суотту нэһилиэгэр дьадаҥы кэргэҥҥэ төрөөбүтэ. Уол кыра эрдэҕиттэн бары үлэҕэ активнайдык кыттара. Ордук сайын от кэбиһиитигэр кыайыылаахтык үлэлиирэ. Кини 6 көлө аҕалар отун соҕотоҕун кэбиһэрэ. Хас күн аайы ортотунан 19 тонна оту кэбиһэрэ. Маны таһынан кыһынын үстүү көлөнөн күҥҥэ иккитэ кырынан от тиэйэрэ. Онон бу сындалҕаннаах үлэтин иһин 1940 сыллаахха ударник аатын ылбыта. 1943 сыллаахха Аҕа дойдуну көмүскүүр сэриигэ ыҥырыллан барбыта. Кини илиҥҥи фроҥҥа 649-с стрелковай полкаҕа, кэлин 1075-с отдельнай стрелковай батальоҥҥа стрелогунан сулууспалаабыта. 1945 сыллаахха атырдьах ыйын 9 күнүттэн балаҕан ыйын 3 күнүгэр диэри Японияны кытта сэриигэ кыттыыны ылбыта. Онно «Японияны кыайыы иһин» медалынан наҕараадаламмыта. 1945 сыллаахха дойдутугар эргиллэн кэлбитэ уонна колхоз производствотыгар үлэлээн барбыта. Кини 1974 сыллаахха сынньалаҥҥа тахсыар диэри колхозка, совхозка сүрүн үлэтинэн сайын от кэбиһиитэ, кыһын от тиэйиитэ этэ. Иван Карлович уһун кыһамньылаах үлэтин сыаналаан коммунистическай үлэ ударнигын бочуоттаах аатын иҥэрбиттэрэ. Аҕа дойду сэриитин II степеннээх орденынан, «Японияны кыайыы иһин», «1941-1945 сс. Аҕа дойду Улуу сэриитин сылларыгар килбиэннээх үлэтин иһин» мэтээллэринэн наҕараадаламмыта. Кэргэнэ Тусахова Мария Михайловналыын 7 оҕону төрөтөн сүһүөхтэригэр туруорбуттара. 1988 сыллаахха өлбүтэ.