ПЕСТРЯКОВ ИННОКЕНТИЙ ЕГОРОВИЧ (1919-1945)

1919 сыллаахха Уоһук Эбэтигэр төрөөбүт. Аҕата Пестряков Егор Иванович, ийэтэ Ульяна Михайловна Пестрякова (Колодезникова) «Октябрь» колхозка, хонуу үлэтигэр, сүөһү көрүүтүгэр үлэлээбиттэр. Иннокентий Егорович сэрии иннинэ Курбуһах сэттэ кылаастаах оскуолатыгар ударнигынан үөрэммит. Комсомол чилиэнэ. Үөрэҕин Дьокуускай куоракка салҕаабыт.

Кыһыл Армия кэккэтигэр 1940 сыллаахха балаҕан ыйын 15 күнүгэр Дьокуускай куорат байыаннай комиссариатынан ыҥырыллыбыт. Гвардия лейтенана званиелаах Иннокентий Егорович 129-с гвардейскай стрелковай дивизия 320-с гвардейскай стрелковай полк стрелковай взводун командирынан сэриилэспит. Кини хорсун быһыытын иһин «Аҕа дойду сэриитин» П-с степеннээх орденынан 19.04.1944 сыллаахха, «Кыһыл Сулус» орденынан 27.08.1944 сыллаахха наҕараадаламмыт.

Госпитальга эмтэнэ сыттаҕына, байыаннай врачтар продовольственнай этэрээккэ байыаннай командирынан үлэлээ диэбиттэригэр сөбүлэспэккэ, инники кирбиигэ барбыт.

1945 сыллаахха кулун тутар 30 кунүгэр сэриигэ геройдуу охтубут. Өлбүтүнтуһунан суругу төрөппүттэрэ 1945 сыл ыам ыйын 1-кы күнүгэр туппуттар. Оҕобут кыайан-хотон эр гиллэн кэлиэ диэн күүтэ сылдьыбыт аҕа ийэтэ ыарахан сүтүгү көрсүбүттэр.

Көмүс уҥуоҕа Польшаҕа Прухна дэриэбинэтигэр көмүллэн сытар.