ОКОЕМОВ ГАВРИЛ МАКАРОВИЧ (1912-1974)

1912 сыллаахха төрөөбүт. Сэрии иннинэ колхозка үлэлээбит. «Моой Үрэҕинэн, Ааллаах-Үүнүнэн таҥас таһыытыгар хаҥыл аттары сыһытан үлэлээбит уол оҕо үс кырыылааҕа»,— диэн сэрии ветерана, биир дойдулааҕа Местников П.И. ахтыытыгар суруйар.

1941 сыл сэриигэ барбыт. Фроҥҥа кавалерийскай чааска түбэһэр. Москва аннынааҕы уоттаах сэриигэ кыттар. Бастакы атаакаҕа атынан киирэн иһэн снаряд эстиитигэр ата өлөр, бэйэтэ түөһүгэр, ойоҕоһугар бааһырар Эмтэнэн баран ыстыыгынан сэриигэ кыттан иккистээн улаханнык бааһырар. Үсүһүн сэриигэ киириитигэр тыҥатыгар бааһырар 1943 сыллаахха тыҥатыгар снаряд оскуолкалаах дойдутугар кэлэр.

Сэрии кэнниттэн Молотов аатынан колхозка председателинэн, биригэдьииринэн үлэлээбит.

1974 сыллаахха ыалдьан өлбүт. Үс кыыстаах, 11 сиэннээх уонна 10 хос сиэннээх.