КОЛЕСОВ НИКОЛАЙ АЛЕКСЕЕВИЧ (1923-1984)

1923 сыллаахха Алексей Яковлевич, Наталья Семеновна Колесовтар диэн ыалга бастакы оҕонон Чагдаҕа Көрдүгэн диэн алааска төрөөбүтэ. 1942 сыллаахха 18 сааһын туолаат, Чурапчы военкоматынан ынырыллан Аҕа дойдуну көмүскүүр улуу сэрии саамай үгэннээн турар ыарахан кэмигэр барбыта. Иркутской уобаласка Мальта станцияҕа баар байыаннай чааска бастакы сүрэхтэниитин байыаннай үөрэҕи барбыта. Ликбез эрэ үөрэхтээх, нууччалыы билбэт киһиэхэ бастаан утаа ыарахан курдуга. Ол курдук 585-с стрелковой полкаҕа 1 сыл стрелогунан сылдьыбыта. 1943 сыллаахха икки төгүллээн арҕаа фроҥҥа ыыта сатаабыттарын бииригэр командира Саха сириттэн саҥа кэлэр пополнениеҕа тылбаасчыт оҥостоору ходатайстволаан хааллартарбыта, бииригэр ыйааһына кыайан хапсыбакка хаалбыта. 61-с мотострелковой чааска стрелогунан 5 ый, 718-с полевой хлебопекарняҕа пекарынан, 32-с инженерно-сапернай чааска саперынан 1945 сыл кулун тутар ыйга диэри сулууспалаабыта. Онтон Японияны кытары сэриигэ Монголияҕа Улахан Хингаҥҥа саперынан сылдьыбыта. 1947 сыл муус устар бутэһигэр демобилизацияланан дойдутугар бэс ыйыгар этэҥҥэ эргиллэн кэлбитэ. Сталин бирикээһинэн командованиеттан хас да махтал суруктаах, грамоталардаах. Кыайыы 20-25, 30- 35 сс. юбилейнай медаллардаах. Дойдутугар эргиллэн кэлэн тута эйэлээх олох тутуутугар кыттыспытынан барбыта. Колхозка биригэдьииринэн, кыладыапсыгынан үлэлээбитэ. 1949 сыллаахха  Копырина Прасковья Иннокентъевнаны кытары холбоһон ыал буолан, 12 оҕону төрөтөн, онтон 10 оҕону иитэн-үөрэттэрэн улаатыннарбыттара. Кэлин наар колхозка, совхозка фермаҕа бостуугунан, кыһынын сүөһү аһатыытыгар пенсияҕа тахсыар диэри үтүө суобастаахтык үлэлээбитэ.

1984 сыллаахха атырдьах ыйын 27 күнүгэр ыалдьан өлбүтэ. Николай Алексеевич олорон ааспыт олоҕун элбэх ахсааннаах оҕолоро, сиэннэрэ, хос сиэннэрэ салгыыллар, кинини умнубаттар, кэриэстииллэр.