ОЛЕСОВ НИКОЛАЙ ПЕТРОВИЧ (1925-2019)
Коля Олесов 1925 сыллаахха алтынньы ый 14 күнүгэр Сыҥаах нэһилиэгэр 1 Лөгөйгө дъаданы бааһынай кэргэҥҥэ күн сирин көрбүтэ. Коля 1934 сыллаахха Суотту сыһыытыгар бастакы кылааска үөрэнэ киирбитэ, онтон Баатаҕай оскуолатыгар 1941 сыллаахха бэс ыйыгар 7 кылааһы ситиһиилээхтик үөрэнэн бутэрбитэ, олоххо инники былааннары оҥосторо. Ол эрээри кырыыстаах буорах сыттаах, харах уулаах, алдьархайдаах Аҕа дойду сэриитэ саҕаланан, онуоха эбиитин ийэтэ барахсан күн сириттэн күрэнэн салгыы үөрэнэр кыаҕа суох буолбута. Дойдуга кураан буолан от, уунээйи, сир aha үүммэккэ алаастар, сыһыылар хара буорунан көрөн аһыҥа ыһан алдьархайдаах аччыктааһын саҕаламмыта. 1941-1943 сс. уон сэттэлээх Коля колхуоска үлэлээбитэ да дохуот диэни аахсыбатаҕа, кини икки кыра бырааттарын ыксаан уруулара дъоҥҥо батарбыта, аҕата дъиэтигэр кыыһын кытары хаалбыттара. Николай бэйэтэ сэбиэттэн, холкуостан көнүл көрдөһөн Бороҕоҥҥо аттаммыта. Байыаннай үөрэҕэр үөрэнэ-үөрэнэ үлэ көрдөһөрө да, бу уол колхозтан күрээри гынар диэн ким да үлэҕэ ылбата. Арай амарах сүрэхтээх почта начаалынньыга Сидор Иванович Васильев кинини сибээс линиятын көрөччүтүнэн ылбыта. Бу улахан эппиэтинэстээх үлэ этэ, оройуон радиотын, телефонун, уотун линиятын барытын көрөллөрө.
Ити улэлии сырыттаҕына 1945 сыл бэс ыйыгар армияҕа ынырыллыбыта. Салгыы Японияны утары сэриигэ киирсибитэ. Кини 1945 сылтан 1951 сыл ыам ыйыгар диэри 21-с саппаас стрелковой полка 41-с стрелковой дивизиятыгар сулууспалаабыта. Алта сыл сулууспалаан баран төрөөбүт оройуонугар кэлбитэ уонна Госстрахха инспекторынан үлэтин саҕалаабыта. 1952 сылтан милиция органыгар араас дуоһунастарга 28 сыл устата үтүө суобастаахтык үлэлээн баран полковник званиелаах пенсияҕа тахсыбыта. Ор сынньаппатахтара. Биир ый буолаат ССРС Министэрдэрин Советын Саха сиринээҕи уполномоченнайынан анаммыта уонна ити дуоһунаска cитиһиилээхтик үлэлээн дьон-сэргэ махталын ылбыта.
Кини түөһүн «Японияны кыайыы иһин», «1941-45 сс. Аҕа дойду Улуу сэриитин сылларыгар килбиэннээх үлэтин иһин», «В.И.Ленин төрөөбүтэ 100 сыла туолуутун бэлиэтээн. Килбиэннээх үлэтин иһин» мэтээллэр, ИДЬМ-игэр энкилэ суох үлэтин иһин I,II,III степэннээх знактара, о.д.а. киэргэтэллэр.
Кини 1953 сыллаахха Мурунова Степанида Мироновнаны кытта холбоһон дьоһуннаах ыал буолбуттара. 4 уолаттара аҕаларын суолунан ИДЬМ араас дуоһунастарга ситиһиилээхтик үлэлээбиттэрэ, онтон кыыһа билигин пединститукка студеннары үөрэтэр. Николай Олесов куустээх санаата, олоххо таптала кинини инники угуйбута, киһи киһитэ буоларыгар күүс-тирэх буолбута.