Мин Кыһыл Сардаҥа Уһун - Күөл учаастагар Туостаах диэн алааска олохтоох Лыткин Николай Яковлевич уонна Гуляева Вера Ивановна диэн колхозтаах дьиэ кэргэҥҥэ 1936 сыл балаҕан ыйын 10 күнүгэр төрөөбүтүм, эрээри докумуон суруллуутугар сыыһа баран алтынньы ыйынан сурудда сылдьар. Ийэм сэрии кэмигэр 1943 сыллаахха өлбүтэ. Аҕам сэрии кэнниттиэн суох буолбута. Бииргэ төрөөбүт 18 оҕо этибит. Онтон 14 уол 4 кыыс баарыттан, ыар аччык кэмнэр барыларын эрдэ үйэлээбитэ. Икки уол уонна 3 кыыс хаалбыппыт. Миигин бииргэ төрөөбүт эдьиийдэрим Матырыастаах , Балбаара иигин көрөн ийэбин солбуйбуттара, тулаайах оҕолорго дьааһыла.
Билиҥҥинэн Детсад арыллан онно ыланнар тыыннаах хаалбытым. Дьааһылаҕа даҕаны хас да оҕо аччыктаан өлбүттүн өйдүүбүн. Аһылыкка биэрэр уу судураай , бүтүннүү хомуох хааһы биэрэллэриттэн, хомуоҕун испиискэ хаатыгар хаалаан дьиэбэр илдьэрим, эдьиийдэрим ууга ытыйан сиэн тыыннаах хаалбыттара. Тулаайах буолан кыайан үөрэммэтэҕим. Оччотооҕу кырыымчык ыар кэми, аччыктааһыны, тоҥууну – хатыыны , эрэйдээх ыарахан олоҕу, сут кэмин, барытын кыра эрдэхпиттэн эппинэн хааммынан билэн улааппытым, хаһан да умнубаттык өйбөр санаабар өһөн хаалбыт ыар санаа.
Сут кэмигэр аҥардас Уһун –Күөлгэ биллэринэн 59 киһи ас-таҥас тиийбэтиттэн хоргуйан өлбүттэрэ, кыайан көмөр кыахтара суох буолан тоҥ дьиэҕэ, хотоҥҥо дьон өлүгүн мунньан саас халлаан сылыйбытын кэннэ, оҕус сыарҕатыгар тиэйэн эдьиийим Матырыас , Лыткина Анна Алексеевна, Лыткина Мария Петровна, Копырина Евдокия Дмитриевна буолан көмөлөөн илдьэн барыларын илдьэн ииҥҥэ көмүтэлээбиттэр.
1957 сыллаахха Бээрийэттэн төрүттээх Турантаев Еремей Афанасьевич диэн уолга кэргэн тахсан, дьиэ - уот туттан , күрүө – хаһаа тэринэн харыс да сиргэ халбарыйбакка төрөөбүт Уһун - Күөлбэр олохтоохтук олохсуйбутум, 10 оҕону төрөтөн, биһиктээн ийэ аҕа дьолун билбиппит
Сэрии кэнниттэн бүттүүн урусхалламмыт дойдуну атаҕар туруорууга , саҥа эйэлээх олоҕу тутууга , ааспыт үйэ дьоно биһи , сэрии кэминээҕи оҕолор атахпытыгар туран , эдэр эрчимнээх сааспытыттан үлэни өрө туппуппут, үлэттэн дьолломмуппут.
Колхозка субан сүөһү көрүүтүгэр, онтон Партизан – Заболоцкай аатынан совхоз Уһун – Күөл отделениятыгар доярканан үлэлээбитим, оччотооҕу дьон үлэни өрө тутан олус эппиэтинэстээхтик , үрдүк ирдэбиллээхтик, сыһыаннаһарбыт, ол иһин да буолуо эдэр дояркаларга наставнигынан сыһыарбыттара. 1975 сыллаахха « Сардаҥа » ферма старшайынан ананан, социалистическай куоталаһыыга былааны толорууга үрдүк көрдөрүүлэри ситиспиппит, 1982 сылаахха биир ыанар ынахтан - 2000 кг 1983 сылаахха - 2011 кг үүтү ыаммыт былааны аһара толорбуппут. Бу үлэлиир сылларбар « Сардаҥа » ферма юбилейнай өйдөбүнньүк вымпелынан Социалистичесай куоталаһыы түмүгэр 1982.1983, 1984, 1985, 1987 сылларга ферма коллектива бастакы миэстэлэри ыларыгар мин кылаатым эмиэ баарыттан олус киэҥ тутта, астына саныыбын. 30- тан тахса сыл үлэлээн пенсияҕа тахсыбытым.
Үлэлиир сылларбар үрдүк көрдөрүүлэрим иһин үгүс элбэх Бочуотунай грамоталары , Махтал бэлиэ суруктары , дипломнары туттрбыттара.Пенсияҕя тахсан баран олохтоох библиотекаҕа тех үлэһитинэн үлэлээбитим. 23 сиэннээхпин , 24 хос сиэннээхпин 81 сааспар үктэнэнним.
IX , XI пятилетка Ударнига буолбутум.
1975,1978 сылларга социалистическай куоталаһыы кыайыылааҕа, коммунистическай Үлэ ударнига анал знактара.
Улуу Кыайыы 50 ,60 сыллара медаль
1984 с Үлэ ветерана
I – Өспөх нэһилиэгин Экономическай сайдыытыгар кылаатын иһин знак
Кулун тутар 25 күнэ 2017 сыл Уһун – Күөл