АНДРОСОВ ИВАН ГАВРИЛОВИЧ

(1908 -    )

1908 сыллаахха атырдьах ыйын 2 күнүгэр Тандинскай нэһилиэгэр Тандыгыга Туора Тумуһахха - Буоталга төрөөбүт. Аҕата Гаврил Данилович, ийэтэ Екатерина Алексеевна – (1891 сыллаах төрүөх) сэниэ ыал эбит. 1925 сыллаахха Танда сэттэ кылаастаах оскуолатын бүтэрэн Дьокуускайдааҕы 4 сыллаах педтехникумӊа үөрэнэ киирбит. 1927 сыллаахха комсомол чилиэнэ буолбут.

1929 сылтан А.С. Бубнов аатынан Москватааҕы пединститутка үөрэнэн историческай отделениены бүтэрбит. 1932 сылтан Якутскайга педтехникумңа преподавателинэн, Саха АССР Наркомпеһыгар инструкторынан, комсомол горкомугар политүөрэхтээһин отделын заведующайынан, онтон НКВД органнарыгар сотруднигынан үлэлээбит. 1939 сылтан ССРС журналистарын союһун чилиэнэ.

     1942 сыл бэс ыйыгар Кыһыл Армия кэккэтигэр ыңырыллыбыт. Смоленскайга артиллерийскай училищеҕа үөрэммит, 1943 сыл олунньуга 855-с артиллерийскай полкаҕа взвод командирынан анаммыт. Бу сыл ахсынньытыгар ССКП чилиэнэ буолбут. 1, 2 Прибалтийскай 1 Белорусскай фроннар састааптарыгар киирсэн кыргыһыыларга кыттан Новгородскай, Ленинградскай, Псковскай уобаластары, Польшаны босхолоһон Берлиңңэ тиийбит. Сэриини Эльбаҕа түмүктээбит.

Лейтенант Андросов «Кыһыл Сулус» орденынан наҕараадаламмыт, 13 төгүл Советскай Сэбилэниилээх күүстэр Верховнай главнокомандующайдара И.В. Сталин илии баттааһыннаах Махтал суруктарын туппут.

1946 сыл алтынньыга дойдутугар демобилизацияланан эргиллэн кэлбит, республиканскай лекционнай бюро директорынан уонна Саха АССР Министирдэрин Советын Управлениетыгар начальнигы солбуйааччынан үлэлээбит, 1954-56 сылларга Өймөкөөннөөҕү ССКП райкомугар пропаганда уонна агитация отделын заведующайынан анаммыт. Онтон салгыы 1970 сылга диэри ССПК обкомун «Ленин суолунан» сурунаалыгар эппиэттиир секретарынан, «Разведчик недр» хаһыат редакторынан, 1972-80 сылларга Якутскайдааҕы гражданскай авиация управлениетыгар политическай иитэр инструкторынан үлэлээбит.