Кривошапкин Иннокентий Ильич I (1900-1948)

1900 сыллаахха Байаҕантай нэһилиэгэр дьадаҥы бааһынай кэргэнигэр төрөөбүтэ. Аҕата Илья Петрович, ийэтэ Дария Гаврильевна ииппит ийэтэ Ульяна Ивановна. Бастакы табаарыстыбалар тэриллиилэригэр “Кыһыл Танда” табаарыстыбаҕа дьонун кытта бастакынан чилиэнинэн киирбитэ.1931 сыллаахха Дьокуускай куоракка педучилищеҕа үөрэнэ барбыта. Ити кэмҥэ Гаврил Васильевич Егоров хас да улууска оскуолалары туттаран үлэҕэ киллэттэрбитэ. Кини Нам оройуонугар II Хомустаахха алын сүһүөх кылаастар оҕолоро үөрэнэр дьиэлэрин бүтэттэрээри сылдьар этэ. Дьөгүөрэп Иннокентий Ильичка үөрэххин кэнники бүтэрээр, оскуола аһыллыытыгар көмөлөс диэн биир дойдулааҕар эппит. Онон ити сыл II Хомустаах оскуолатыгар сэбиэдиссэйинэн туруорсан илдьэ баран үлэлэппит. Иннокентий Ильич 1932 сыллаахха нэһилиэнньэ көмөтүнэн саҥа оскуоланы үлэҕэ киллэттэрбит. Ол үлэтигэр-хамнаһыгар, куоратынан сылдьарыгар Гаврил Васильевич куруутун кэлэ-бара сылдьан бэрэбиэркэлиирэ, көмөлөһөрө үһү. II Хомустаах оскуолатыгар учууталлаабыт. Ону таһынан ликпуун астаран улахан дьону үөрэппит. Билигин II Хомустаах оскуолатын музейыгар оскуола тутуллуутун туһунан матырыйааллар бааллар. Иннокентий Ильич 1933 сыллаахха кэргэннэнэн, оҕолонон дойдутугар Тандаҕа Гаврил Васильевич туттарбыт оскуолатыгар үлэлии кэлбит. Үөрэҕин кэтэхтэн үөрэнэн бүтэрбит. Оскуолаҕа учууталлыырын таһынан ликпууҥҥа улахан дьону эмиэ үөрэппит. Үлэлии сылдьан 1943 сыл бэс ыйыгар Аҕа дойдуну көмүскүүр сэриигэ барбыта. 1946 сыл сэтинньигэ доруобуйата мөлтөөн сэрииттэн эргийэн кэлбитэ. 1948 сыл ахсынньыга ыарыыта бэргээн биһиги кэккэбититтэн өлөн туораабыта. Иннокентий Ильич кэргэнинээн Елена Степановналыын алта оҕону төрөтөн, иитэн улаатыннарбыттара.