Неустроев Иван Яковлевич (1912-1993)

      1912 сыллаахха Тандинскай нэһилиэккэ төрөөбүтэ. Төрөппүттэрэ үөһээ Тандыгы үрэххэ Лээмпийэ алааһыгар олохтоох дьон эбит. 17 саастааҕар Лука Андросов тэрийсибит «Кэскил» коммунатыгар чилиэнинэн киирбитэ. Нөҥүө сылыгар “Кыһыл Танда” колхозка чилиэнинэн киирэн бырабылыанньа чилиэнинэн, биригэдьиир, председатель эбээһинэстэрин толорбута, Дьааҥы хайатынан, Тукулаан үрэҕин таһаҕас таһыытыгар сылдьыбыта.

1943 сыл бэс ыйын 3 күнүгэр Кыһыл Армия кэккэтигэр ыҥырыллан барбыта. 293-с мотострелковай полкаҕа 2-с стрелковай ротаҕа пулеметчигынан Япония империалистарын утары сэриигэ киирбитэ, Хайлар куораты босхолуур кыргыһыыга кыттыбыта.

1946 сыллаахха дойдутугар эргиллэн кэлбитэ уонна «Кыһыл Танда» колхоз председателинэн быыбардаммыта. Кэлин биригэдьииринэн, ферма сэбиэдиссэйинэн, маҕаһыын атыылааччытынан үлэлээбитэ. ССПК чилиэнэ, үрдүк таһаарыылаах үлэтинэн 1955 сыллаахха Москваҕа Бүтүн Союзтааҕы норуот хаһаайыстыбатын быыстапкатыгар сылдьыбыта.

1993 сыллаахха ыалдьан өлбүтэ. Бастакы кэргэниттэн Стрекаловская Анна Васильевналыын Мария диэн кыыстаахтар, иккис кэргэнэ Крылова Анастасия Милентьевналыын биэс оҕону үлэһит дьон оҥорбуттара, элбэх сиэннээхтэр.