1911 сыллаахха Байаҕантай нэһилиэгэр Буотама диэн сиргэ төрөөбүтэ. Сайылыктара Туора Тумуһах. Аҕалара Иван Евсеевич, ийэлэрэ Мария Петровна Мигалкина колхозка биир бастакынан киирбиттэр.

1923-29 сс. Танда ситэтэ суох орто оскуолатыгар үөрэнэн 6 кылааһы бүтэрбитэ. 18 сааһыгар комсомолга киирэн сир реформатын ыытыыга, тыа хаһаайыстыбатын холбоһуктааһыҥҥа актыыбынайдык үлэлэспитэ. 1931-33 сс. Дьокуускайга уобаластааҕы партийнай оскуоланы бутэрбитэ. 1932 сылтан ССПК чилиэнэ этэ. Уһун кэмҥэ республика прокуратуратын систематыгар эппиэтинэстээх салайар үлэлэргэ сылдьыбыта.

1941 сыл от ыйын 23 кунугэр Дьокуускайдааҕы типография кадрга отделын сэбиэдиссэйинэн үлэлии олорон Кыһыл Армия кэккэтигэр ыҥырыллыбыта.

Буойун дьонугар элбэхтик суруйара. Танда музейыгар кини 21 суруга саха үөрэхтээх, сайдам эдэр киһитин фроннааҕы олоҕун туоһута буолан кичэллээхтик хараллан сыталлар.

«Кунду кэргэним Маруся, үтүө күнүнэн! Сэриилэһэр армияттан итии бойобуой эҕэрдэни ыытабын! Тыыннаахпын уонна доруобайбын. Кун тура-тура фрицтэри утары кыргыһабыт, кыайан-хотон иһэбит. Немецтэр диэн кыыллыйбыт дьон, оккупациялаан ааспыт сирдэригэр оннук суолу-ииһи хааллараллар, ол иһин кинилэргэ харыс суох.

Барыгытыгар дьоллоох олоҕу уонна утуө доруобуйаны баҕарабын. Сэрии хампаанньата        тумуктэнэрэ чугаһаата, сотору өстөөҕу кыайан-хотон дойдубутугар эргиллиэхпит.

Эһиги аҕаҕыт Андрей.

1944 сыл бэс ыйын 10 күнэ.»