1912 сыллаахха Тандинскай нэһилиэккэ Тандыгыга Быскыыр Баһылай дьиэ кэргэнигэр төрөөбүт.«Табалаах» колхозка биригэдьииринэн үлэлии сылдьан 1941 сыл атырдьах ыйын 12 күҥүгэр Кыһыл Армия кэккэтигэр ыҥырыллыбыт. Кини 128-с Краснознаменнай Туркестанскай горнострелковай гвардейскай дивизия, 393-с Ялтинскай Богдан Хмельницкай орденнаах полк пулеметчига этэ. Иван Готовцев Крымы босхолуур иһин кыргыһыыга эрдээхтик сэриилэһэн бастакы наҕараадатын — «Хорсунун иһин» медалы ылбыта. Хорсун буойун Чехословакияны босхолуур иһин кыргыһыыларга командование бирикээстэрин үтүө суобастаахтык толортоон «Кыһыл Сулус», Албан аат үһүс степеннээх орденнарынан наҕараадаламмыт.
Кини 1944 сыл олунньуый 18 күнүгэр убайыгар Калининскай Иннокентий Васильевичка суруйбут суруга Танда музейыгар баар. Бу манна: “Готовцев Роман, Брунасов, Посельскай Иннокентий ыарыылаахтарынан дойдуларыгар тиийбиттэр. Ябловскай Егор Роман., Окоемов Семен рани буолан тиийбиттэр. Мин ийэм тыыннаах олорор дуо? Митрофанов Иван Иванович дойдутугар эмиэ тиийбит. Кини монгуолга сырыппыт дуо? Мин монгуолга икки сыл кэриҥэ сылдьыбытым онтон фроҥҥа Крымҥа сырыттым. Билигин Чехословакияҕа баарбын” - диэн суруйбут.
«Кыайыы үтүөтэ киһи иккиһин төрөөбүтүн курдук күндү үөрүүтэ. Кыайыы кэнниттэн дойдубутугар Советскай Союзка Ужгородка диэри 1000-тан тахса километры 56 күн устата сатыы айаннаан кэлбиппит. Поеһы күүттэххитинэ дойдугутугар эһиил төннүөххүт диэбиттэрэ. Кыайыы, дойдуга төннүү үөрүүтэ оннук күүстээх этэ, кыаллыа да суоҕу кыайбыппыт, барыбыт санаата күүһэ-уоҕа көтөҕүллүбүтэ, оннук өрөгөйдөөх буолбута» диэн кэпсээбит оччотооҕу кэмнэри хорсун буойун.
Сэрииттэн эргиллэн баран Иван Васильевич дьиэ-уот тэринэн оҕо-уруу тэнитэн Суотту нэһилиэгэр олохсуйан олорбут. 1972 сыллаахха ыалдьан өлбүт.