1917 сыллаахха Байаҕантай нэһилиэгэр төрөөбүт. Аҕата Петр Васильевич «Кыһыл Танда» колхоз чилиэнэ, биригэдьиирэ. Ийэтэ Матрена Иосифовна Таатта Баайаҕатыттан төрүттээх.Чурапчытааҕы педучилищены бүтэрэн баран Горнай Бэрдьигэстээҕэр учууталлыы сылдьан 28.08.1942 с. Дьокуускайдааҕы холбоһуктаах ОВК-нан фроҥҥа ыҥырыллыбыт. ССКП чилиэнэ. 30-с танковай корпус младшай лейтенана Николай Петрович 30.07.43 с. өлбүт. Орловскай уобалас Болковскай оройуонун Борилово дэриэбинэтигэр уопсай ииҥҥэ көмүллүбүт.

Матрена Иосифовна Готовцева иккис уолуттан Николайтан эмиэ хас да суруктары туппута. Уолаттарын суруктарын кичэллээхтик уура сылдьыбыт.Николай Петрович бастакы суругар 6 ыйдаах Сретенскэйдээҕи байыаннай пехотнай училищеҕа үөрэнэрин биллэрбит.

Кини иккис суруга: «01.02.42 с. Тапталлаах ийэм дорообо! Эйиигиттэн биир да сурук тута иликпин. Үлэлээбит сирбиттэн Горнайтан эмиэ сурук кэлбэт. Мин уөрэнэр ротабар сахалар алтыабыт...

Үөрэхпин бутэрдэхпинэ орто командир буолуохтаахпын. Онон кадров ай сулууспаҕа сылдьар буоламмын аттестация биэрдилэр. Ол аттестациябын сурук иһигэр уган эйиэхэ ыытабын. Убайым Хабыыча суруйар дуо? Ханна баарый? Илья хайа оскуолаҕа учууталлыыр? Биитэр амияҕа ыкырыллыбыт дуу? Филипп Колодезниковтаах хайдах олороллоруй? 

Суруйдум эн таптыыр уолуҥ Николай».

«16.09.42 с. Тапталлаах ийэм Матрена Иосифовна, дорообо!

Сылдьыы доруобуйа учугэй. Билигин взвод командирынан үлэлиибин. Олох, усулуобуйа чааһа учугэй...Мин ыйга 400 солкуобай хамнас ылабын. Сотору эйиэхэ харчы переводтуом. Маннык аадырыска суруйуҥ:

Полевая почта 1491,644-й Стрелковый полк,7-я стрелковая рота, младшему лейтенанту Готовцеву Н.П.

Үчугэйдик этэннэ олор сэрии кэнниттэн кыайыынан эргийэн тиийиэм. Таптыыр уолук Николай».

 Педагог, коммунист Н.П.Готовцев сэрииттэн эргийбэтэҕэ. Ийэ дойду көҥүлүн уонна тутулуга суох буолуутун иһин эдэр олоҕун толук биэрбитэ.