1914 сыллаахха Тандинскай нэһилиэккэ Тандыгыга Мандаайы диэн сиргэ 9 оҕолоох Ирина Кузьминична уонна Петр Егорович Готовцевтар диэн ыалга төрөөбүт. Танда оскуолатын 4 кылааһын бүтэрбит. 1934 сылтан «Табалаах» колхоз чилиэнэ.1941 сыллаахха Чурапчы РВК-нан ыҥырыллан атырдах ыйын 11 күнүгэр сэриигэ барбыт. Байыаннай үөрэҕи барбыттарын кэннэ Ленинградскай фроҥҥа атаарбыттар.1942 сыллаахха кулун тутар 9 күнүгэр аан бастаан атаакаҕа киирбит күнүн Байбал маннык ахтара: «Ыраах көстөр урдэл сири ылыахтааххыт диэн бирикээстээбиттэрэ. Күнүһүн хаары хаста-хаста тобулу туһэн сытабыт. Түүнүн хараҥарар, ол кэннэ иһирдьэ киирэ сатыыбыт. Сарсыарда сырдаатар эрэ ытыалаһыы саҕаланар, киэһээ боронуй буолуута арыый сэллиир. Ити курдук икки өттүттэн 5 күнү быһа мөҕүстүбүт. Кулун тутар 16 күнүгэр сарсыарда фашистар хас да чаас устата артиллериянан ытыалаатылар. Сотору-сотору снарядтар туһэн эстэр тыастара ньиргийэн олорор. Онтон эмискэ хаҥас илиим «ньир» гынна, снаряд оскуолката илиибин үлтү көтөн ааста. Ону былаатынан саба тардан баран кэннибинэн үнэн баран истэхпинэ, өр буолбата, өстөөх буулдьата булгунум уҥуоҕун супту көтөн кэбистэ. Өйбун сүтэрэ-сүтэрэ өйдөнөн кэлэбин. Буулдьа киһини өндөппөт, снарядтар сотору-сотору кэлэн түһэллэр. Снаряд түспүт боруонкатыгар нэһиилэ сыыллан киирдим, хас да өлбүт киһи сытарыгар быыстарыгар киирэн сыттым. Онтон төһө өр өйө суох сыппыппын билбэппин, биирдэ өйдөнөн кэлбитим ыт үрэрин курдук саҥа иһиллэр. Үөһээ өстөөх саллааттарын күлүктэрэ көстөр. Биирдэстэрэ аллараа түһэн, сытар дьону тэбиэлээтэ, дьолго мин түгэххэ сытар буолан таарыллыбатым быһыылаах. Дьэ ол курдук өйө-төйө суох сыттахпына,бэйэбит санитардарбыт булан ылан, санчааска таһаарбыттар этэ».Павел Петрович 15-с гвардейскай дивизия, 12-с стрелковай ротатыгар рядовой саллаатынан сылдьыбыт. Ленинград куораты немецтэр төгүрүктээһиннэригэр 14 суукка устатыгар 9 төгүл суостаах ытыалааһыҥҥа киирбит. Ыар баастары ылан Ярославльга, Свердловскайга хаста да госпитальга эмтэнэн, алтынньы ыйга дойдутугар эргиллэн кэлбит.Партизан Егоров аатынан колхозка кадровай булчутунан, субай сүөһү бостуугунан, сылгыһытынан сааһын тухары эҥкилэ суох үлэлээбит.1980 сыллаахха балаҕан ыйын 1 күнүгэр ыарахан ыарыыттан өлбүтэ.Таатта Баайаҕатыттан төрүттээх Мария Уоһукабына Поповалыын 6 оҕону улаатыннаран үлэһит дьон оҥорбуттара, элбэх сиэн ыччаттардаахтар.