Бочкарев Афанасий Захарович

 Лейтенант АФАНАСИЙ ЗАХАРОВИЧ БОЧКАРЕВ Дүпсүн улууһугар I Өспөх нэһилиэгэр Остуойка Улахан Арыылаах алааһын Томторугар 1914 сыллаахха тохсунньу 14 күнүгэр дьадаҥы ыалга – Захар Романович, Парасковья Федоровна Бочкаревтарга төрөөбүт. Дүпсүн оскуолатын 7-с кылааһын 1935 сыллаахха бүтэрбит, ол кэнниттэн Дьокуускай куоракка учуутал техникумун бүтэрэн, Баатаҕайга Чараҥай оскуолатыгар учууталлаабыт. Өнөр нэһилиэгин кырдьаҕастара ахталларынан, Өнөргө саҥа тутуллубут кулуупка оскуола аһыллар буолбутугар, 1941 сыллаахха сэбиэдиссэйинэн ананан кэлбит. Афанасий Захарович нэһилиэк, холкуос салалталарын, нэһилиэнньэ көмөлөрүнэн оскуоланы бириэмэтигэр астарбыта. Саҥа оскуола биир сыл бэрт үчүгэйдик үлэлээбитэ. 1942 сыллаахха сэриилэһэр армияҕа ыҥырыллыбыта. Свердловскай куоракка ахсынньы 15 күнүгэр диэри үөрэххэ сылдьыбытын туһунан дьонугар суруйбут. Салгыы Ленинградтааҕы Энгельс аатынан байыаннай-политическай училищеҕа үөрэнэн, «Кыһыл Знамя» орденнаах I-гы механизированнай биригээдэҕэ рота командирын политчааска солбуйааччынан 1943 сыл кулун тутар 17 күнүгэр ананар. Политруктар дуоһунастарын суох оҥорбуттарын кэннэ 4-с Гвардейскай армия лейтенаннары бэлэмниир курсугар үөрэнэр. Бу курсу бүтэрээтин кытта 350-с стрелковай дивизияҕа 1180-с стрелковай полк взводун командирынан ананар. Сэриилэһэ сылдьан 1943 сыл ахсынньы 25 күнүгэр Белоруссияҕа геройдуу өлбүтүн туһунан дьонугар, ийэтин аадырыһыгар биллэрии кэлбит. Көмүс уҥуоҕа Белорусскай ССР Житомир уобалаһын Радомышскай оройуонун Гута Забелецкай дэриэбинэтигэр тутуллубут. Армияҕа сылдьан БСК(б)П чилиэнигэр кандидат.

 Ити курдук Эһэлээх оскуолатын маҥнайгы сэбиэдиссэйэ Ийэ дойдутун иһин сырдык олоҕун толук уурбута. Кэргэннэммэтэҕэ. («Память» кинигэ I тома, 70 стр., Б-440, «Офицеры-якутяне» кинигэ, 24 стр., Б-88.)