МИГАЛКИН ПЕТР ПРОКОПЬЕВИЧ (1920-1942)

1920 сыллаахха төрөөбүт. 1941 сыллаахха атырдьах ыйын 15 күнүгэр Мэҥэ-Хаҥалас военкоматынан ыҥырыллыбыт.1942 сыллаахха муус устар 10 күнүгэр өлбүт. Московскай уобалас Юхново сэлиэнньэтигэр көмүллүбүт. Кэргэнэ, оҕото суох.

МИГАЛКИН НИКОЛАЙ ГАВРИЛЬЕВИЧ (1910-1943)

1910 сыллаахха төрөөбүт. 1941 сыллаахха Чурапчы военкоматынан ыҥырыллыбыт. 78-с гвардейскай стрелковай дивизия 228 гвардейскай стрелковай полкатын старшай сержана. 1943 сыллаахха от ыйын 5 күнүгэр өлбүт. Курскай уобалас Дальние Пески дэриэбинэтигэр көмүллүбүт. Кэргэнэ Калининская Елена.

МИГАЛКИН НИКОЛАЙ АЛЕКСЕЕВИЧ (1909-1942)

1909 сыллаахха төрөөбүт. 1942 сыллаахха сэриилэһэр аармыйаҕа барар бэбиэскэ туппута. Ол киэһэ ийэбит убайбыт таҥаһын, өйүөтүн бэлэмнээбитэ. Киэһэ таһынааҕы ыалларын Киргиэлэйдээҕи (Чочуонай), Ылдьаалааҕы (Бүөтүр Ылдьыыс аҕата) кытары бы- растыылаһан киирбитэ. Сарсыарда ийэбит чэй өрө сылдьан иһиттэҕинэ: « Бу этим-сииним хайа эрэ дойдуга тиийэн, буулдьа аһылыга буолуо буолла5а»,— диэн хараҕыттан уу-хаар баһан, бөтөн ылбытын ийэбит тыыннааҕар ахтара. Оҕолор хойутаан турбуппут, убайбыт Ньукулай барбыт этэ. Ол онтон ылата убайбытын букатын сүтэрбиппит. 134-с стрелковай дивизия 629-с стрелковай полкатын рядовойа. Дойдутуттан тэйэн баран, 5 ый кэнниттэн уоттаах сэриигэ, хаан тохтуулаах улахан кыргыһыыга тыына быстыбыт. Өлбүтүн туһунан биллэрии кэлбэтэҕэ. Ол иһин дьоммут өргө диэри күүтэллэрэ. Алтынньы 27 күнүгэр Смоленскай уобаласка Бельскэй оройуон Сверкуны диэн дэриэбинэни ылыы иһин кыргы- һыыга охтубут. Плоское диэн дэриэбинэҕэ кырамталарын аҕалан көмпүттэр. Кэлин ирдэһэн, Улуу Кыайыы 35 сыла буолуон иннинэ, 1980 сыллаахха Подольскай куорат байыаннай архыыбыттан ыйыталаһан билбиппит. Онно Братскай кылабыыһаҕа турар обелиска: «Саха уола Мигалкин Николай Алексеевич» диэн аата-суола суруллубут. Убайбыт Ньукулай утуйар таҥаһын өргө диэри кэриэс оҥостон илдьэ сылдьыбыппыт. Кэргэнэ суох. Аҕата Алексей Сергеевич Мигалкин Байдымаҕа олорбут, аймахтара Розалия Васильевна, Ким Васильевич, Василий Васильевич Мигалкиннар Бороҕоҥҥо, Дьо- куускай куоракка олороллор.

Быраата Мигалкин Ким Васильевич ахтыытыттан

МИГАЛКИН МИХАИЛ СЕМЕНОВИЧ (1915-1992)

1915 сыллаахха төрөөбүт. Саха АССР үтүөлээх зоотехнига, балта Елизавета Семеновна Дьокуускай куоракка олорор. Арҕааҥы фроҥҥа сэриилэспитэ. 1992 сыллаахха өлбүтэ.

МИГАЛКИН МИХАИЛ ДМИТРИЕВИЧ (1905-1987)

1905 сыллаахха төрөөбүт. Сэрии иннинэ промкомбинат үлэһитэ. 1941 сыллаахха Чурапчы военкоматынан ыҥырыллыбыт. Москва куорат көмүскэлигэр генерал-майор П.А.Белов хамаандалыыр кавалерийскай корпуһун састаабыгар киирэн сэриилэспитэ, ол кэннэ 1942 сыллаахха Волховскай фронт 8-с армиятын састаабыгар киирэн Ленинград блокадатын тоҕо көтөр сыаллаах Синявскай үрдэл туһаайыытынан кырыктаах кыргыһыыларга кыттыбыта. 2-тэ араанньы буолбута. 1943 сыллаахха араанньытынан төннөн кэлбитэ, колхозка үлэлээбитэ. Маҥнайгы кэргэнэ Васильева Евдокия Гаврильевна Бээрийэттэн төрүттээх, онтон 2 оҕолоох - Дмитрий, Клара. Иккис кэргэнэ Мария Устиновна Чурапчыттан төрүттээх - 2 уоллаах, Михаил, Егор. Мария Устиновна 1992 сыллаахха өлбүтэ. Клара Чараҥҥа, Михаил Бороҕоҥҥо, Егор Тулунаҕа олороллор. Албан Аат III степеннээх, Аҕа дойду сэриитин I степеннээх орденнарынан, «Москва оборонатын иһин», «Германияны кыайыы иһин» уонна юбилейнай мэтээллэринэн наҕараадаламмыта. 1987 сыллаахха өлбүтэ.