Икки сэрии кыттыылааҕа сержант СЫРОВАТСКАЙ ИВАН ПЕТРОВИЧ

     1942 сыллаахха фроҥҥа ыҥырыллыбыта. 1943 с. 2-с Украинскай фронт сэриилэһэр чааһыгар 76 мм. ЗиС-З пушкаҕа бастаан наводчигынан, кэлин орудие командирынан сэриилэһэ сылдьан 3 танканы, 2 самоходнай орудиены суох оҥорбута. Украинаны, Бессарабияны, Румынияны, Венгрияны, Чехословакияны босхолоспута. «Хорсунун иһин», «Германияны кыайыы иһин» мэтээллэринэн наҕараадаламмыта.

    1945 сыл от ыйыгар кини сулууспалыыр байыаннай чааһын илиҥҥи кыраныыссаҕа Японияны үлтүрүтүүгэ бырахпыттара. Монголия истиэптэригэр өстөөҕү үлтүрүтүүгэ кыттыыны ылбыта. «Японияны кыайыы иһин» мэтээллээх 1947 сыллаахха дойдутугар эргиллибитэ.

   Эйэлээх кэмҥэ өр сыл оройуон лесхоһугар ситиһиилээхтик үлэлээбитэ. Саха АССР Верховнай Советын Президиумун Бочуотунай грамотатынан, «В.И.Ленин төрөөбүтэ 100 сыла туолуутун бэлиэтээн. Килбиэннээх үлэтин иһин» мэтээлинэн наҕараадаламмыта.

СИВЦЕВ ЗАХАР ЯКОВЛЕВИЧ

      1941 сыллаахха фроҥҥа ыҥырыллыбыта. 46-с гвардейскай дивизия 141-с гвардейскай полкатын рядовойунан сылдьан 1943 сыл балаҕан ыйын 22 күнүгэр кыргыһыыга өлбүтэ. Псковскай уобалас Новосокольническай оройуонун Климово-Окни дэриэбинэтигэр көмүллүбүт.

СИВЦЕВ ВАСИЛИЙ ИВАНОВИЧ

(1922-1945)

     1941 сыллаахха фроҥҥа ыҥырыллан тиийэн бастаан илиҥҥи кыраныыссаҕа пограничнай чааска сулууспалаабыта. 1943 сыллаахха арҕааҥҥы фроҥҥа тиийэн Польшаны босхолуур кыргыһыыга геройдуу өлбүтэ.

Псковскай дивизия хорсун буойуна СИВЦЕВ СЕМЕН ПАВЛОВИЧ II

    Сэрии иккис сайыныгар 1942 сыллаахха бэйэтин үөлээннээхтэрин кытары фроҥҥа ыҥырыллыбыта. Кылгас болдьохтоох байыаннай үөрэхтэр кэннилэриттэн Сибиир чаастарыгар киирэн фроҥҥа атаарыллыбыта. Ленинград туһаайыытынан кыргыһар бойобуой суоллаах Кыһыл Знамя орденнаах 128-с Псковскай дивизия састаабыгар түбэспитэ

     1939 сыллаахха тэриллибит бу дивизия 1940 с. финнэри утары сэриилэспитэ, Ленинграды уот уобуруччуттан босхолоспута, Ленинградскай, Псковскай уобаластары босхолоспута, Прибалтикаҕа, Польшаҕа сэ-риилэспитэ. Бу дивизияҕа 20 саха саллааттара сэриилэспиттэрэ, блокаданы көҥү көтүүгэ үксүлэрэ геройдуу өлбүттэрэ, бааһырбыттара. Кинилэр истэригэр 1943 сыллаахха сержант Аччыгый Сэмэн хорсуннар өлүүлэринэн охтубута. Ленинград уобалаһын Мчинскай оройуонугар РП 9 көмүлүннэ диэн биллэрбиттэрэ.

    Аччыгый Сэмэн дьоно, колхозтаахтар аһара сөбүлүүр, таптыыр уоллара этэ. Бииргэ төрөөбүт убайа быраатын төрөппүт оҕотун курдук таптыыра, ытыктыыра. Сэриигэ атаарарыгар төбөтүттэн сыллыы-сыллыы марылаччы ытаабыта. Кэлин да быраатын мэлдьи ахтар, саныыр этэ.

СИВЦЕВ ИВАН ТЕРЕНТЬЕВИЧ

     Үс бырааттыылар Уйбаан, Ньукулай, Охонооһой фроҥҥа сылдьан икки уол бааһыран дойдуларыгар эргиллибиттэрэ. Уйбаан 1942 сыллаахха Сталинград куорат көмүскэлигэр хорсуннар өлүүлэринэн охтубута.